Pasaheronan di avion daña di TUI lo ta ‘pega’ na Corsou te cu diaranson

HATO – Pasaheronan di e buelo di TUI pa Hulanda, cu a sufri un problema cu bentana di e cabina, ta keda Corsou te por lo menos diaranson. Asina representantenan di e aeroliña TUI a informa diamarsa atardi. “Lamentablemente e reparacion di e bentana di e cockpit ta durando mas largo cu a spera” e relato ta cuminsa bisa. “No ta conoci con largo esaki lo tarda. Pero nos kier duna e pasaheronan pega, un siguransa si di e ora cu nan lo bolbe Hulanda”. Como tal e aeroliña a contrata otro avion, un boeing 787 Dreamliner di e aeroliña italiano Neos, cu lo bula diaranson atardi. E aeroliña hulandes mientrastanto a prolonga e estadia di tur esnan pega, cu un dia mas incluyendo alimento y bebida. Ta trata di 300 pasahero cu ta pega na Corsou desde dialuna marduga. 

PROBLEMA

Tabata (manera cu e portal aki a raporta caba) dialuna marduga cu despues di a lanta buelo for di Bonaire rumbo pa Hulanda, cu a tende un zonido duro pa despues un di e bentananan dilanti di e cockpit kraak di tal forma cu e piloto no a haye responsabel pasa laman transatlantico asina. E glas a sker pero e frame di e bentana a want’e ainda ‘aden’ pa e no plama. E avion a baha anochi laat na Corsou, pero como cu e aeropuerto tabata cera caba, pasaheronan no por a baha y mester a warda personal di douane yega pa control. Y esey a tarda basta. Despues no por a aloca camber di hotel pa tur hende, pues un grupo grandi a pasa anochi na aeropuerto. Y aki ta unda cu kehonan a cuminsa zona y no a tarda prome cu rednan social tabata yen di e tipo di keho di pasaheronan disgusta. Potretnan cortesia di Emmy Jansen.