Avion di TUI mester a aterisa di emergencia na Corsou awe marduga

WILLEMSTAD – Un avion di TUI na caminda di Bonaire pa Hulanda, mester a haci un aterisahe di emergencia diadomingo marduga, debi cu un bentana di e cockpit a kibra. E avion tipo boein 787 cu a cuminsa e biahe for di Punta Cana, Republica Dominicano, a aterisa sin problema na Corsou, pero a dura basta, prome cu e pasaheronan por a keda atendi. 

ZONIDO

E problema di e avion a cuminsa ora cu e avion a lanta buelo di Bonaire, y a tende un zonido duro despues di cual un di e bentanan dilanti a sker. Sigui bula, no tabata responsabel pa cual a dicidi di aterisa na Corsou. Sinembargo a dura 2 ora prome cu por a baha e pasaheronan di e avion ya cu e aeropuerto tabata cera y cu mester a localisa e personal douanero pa bin traha. E prome 200 di e 300 pasaheronan a haya lugar pa keda basta liher, pero e otro 100 pasaheronan mester a pasa basta rato na aeropuerto mes, pasobra hotelnan tabata practicamente yen. A ofrece dado momento e refugio di Cruz Cora pero pasaheronan a rechasa esey. E pasaheronan ta biaha diamars anochi bek pa Hulanda. Potret cortesia ANP.