Bermudez: Pago di restitutie posiblemente prome cu fin di aña aki

ORANJESTAD – Esnan cu ta wardando pago di nan placa di restitutie (placa cu gobierno ta paga ciudadano cu a cumpli cu belasting y tin derecho riba cen cu ‘nan a paga di mas), por spera esaki pa fin di e aña aki. E intencion ta pa procesa e sumanan atrasa te cu posiblemente 2012, y paga esaki mas tarda fin di e aña aki. NoticiaCla.com a confronta e mandatario di finanza Angel Bermudez riba e asunto, indicando riba e critica, cu kier sali cobra tur ora pero cu no ta tende nada si di pago di restitutie. Y sigur awor cu gobierno a anuncia cu nan ta bay subi caya y cobra placa atras. Y dado caso e grupo aki (di hendenan cu tin derecho di restitutie) haya cobransa, nan tin preferencia, unda cu e placa cu nan tin cu paga, lo a menos y nan lo bin na remarke pa e suma cu tin derecho riba dje.

SUMA DI RESTITUTIE

Mes momento e mandatario ta sigura cu e suma di restitutie, no ta ‘dje grandi ey’. Pero prome cu por paga e sumanan cu gobierno debe e comunidad, e mester ricibi placa pa por haci esaki. E no por paga si e sistema no ta actualisa, y cu no tin placa. Pero pesey ta trahando duro riba e parti aki tambe, pasobra e ta conciente cu e hendenan aki sigur tin derecho riba e pago. Y como tal, un di su metanan ta sigur, pa (for di e placa cobra) paga e suma di restitutie prome cu fin di aña. No tabata conoci cuanto placa exactamente gobierno debe comunidad na restitutie.

KEHO DI COMUNIDAD

E keho tabata pasobra cada bes gobierno tabata anuncia medida aki y aya, y tabata bin cu proceso pa cobra hende. “Que hubo di e restitutie cu nan debe nos”, tabata kehonan cu por a tende. Ora cu a confronta e mandatario cu esaki, e la acepta cu ta kehonan valido y cu e ta pendiente pa resolve e parti aki tambe.