Di e 2.2 biyon riba caya, solamente 400 pa 500 miyon ta ‘real’

ORANJESTAD – Di e 2.2 biyon florin cu tin riba caya na belasting, solamente un fraccion por ta e suma ‘real’. Inicialmente minister di finanzas Angel Bermudez a bisa cu e suma ta 2.2 biyon florin. Pero na NoticiaCla.com e la admiti awe cu esaki por ta apenas un kwart di esey, cu ta traduci den posiblemente 400 pa 500 miyon florin cu ‘por cobra ainda’. “Pero si mi por cobra por lo menos 100 miyon mes (di e suma total) pa e fin di aña aki, mi ta contento” e mandatario a bisa NC awe.

SUMA INICIAL

E motibo cu e la haci e mencion di e suma inicial grandi biyonario, ta pasobra segun cifra inicial y proceso, esey ta loke ta ‘suppose’ di ta riba caya. Pero entre nan tin sumanan cu no ta corecto, sumanan cu a ‘verjaar’ y otro rasonnan pa cual no por tin acceso na e suma inicial mas. Y como tal e ta conciente cu e suma por ta mucho menos. Aunke asina mes e suma di 400 pa 500 ta suficiente pa cubri e deficit y alivia e situacion.

SUPER MINISTER

Un otro punto cu NoticiaCla. com a cuestiona, ta con bin awor si por cobra e suma grandi aki, mientras cu tur e añanan pasa, ningun minister no a logra. Kico ta pone cu Bermudez ‘diripiente si por’ y cu por convirti’e den un ‘super minister’. E la mustra cu pa cuminsa, e tin e experticio necesario como fiscalista. Di dos, e ta trahando un plan di campaña con pa genera e suma, y den ki forma pa hacie. Y finalmente, e ta restructura cierto areanan cu ta pone cu e tin extra capacidad na personal cu por subi caya y cuminsa cobra. Como ehempel e la duna cu tin un controle team ocupa aworaki pa procesa y controla e añanan 2008 pa 2011 pa por wordo tramita.