Aruba no tabata entre e paisnan cu si a conoce cambio di nivel di alerta di biahe di CDC dialuna

WASHINGTON – Center for Disease Control (CDC) enberdad a baha algun pais di nivel 4 pa nivel 3 di alerta di biahe dialuna. De echo, a move te hasta 7 destinacion,- entre nan di Caribe -, pa e nivel di mas abou (1) di biahe. Pero Aruba no tabata den e 7 destinacionan cu a conoce e cambio ey entre paisnan Caribense y Asiatico. Ademas ta di tres siman cu CDC no a añadi un pais den e categoria 4.  Noticiacla a puntra e minister encarga cu turismo Dangui Oduber for di dialuna kico ta e motibo cu su anuncio di diabierna no a materialisa, pero ainda no a haya un reaccion pa sa kico por a pasa. Esey ta pone cu Aruba ta sigui ainda riba nivel 4, envez di 3 cu a keda anuncia cu e lo a cambia. 

NIUN CAMBIO

Manera cu e portal aki a raporta dialuna caba, e nivel di alerta di biahe pa Aruba for di Merca, dialuna atardi keto bay tabata nivel di mas halto, esta nivel 4 pa loke ta Covid19. Esaki no obstante cu diabierna minister di turismo Dangui Oduber a bisa cu esaki lo a cambia entrante awe dialuna 10 di April. E alerta ultimo biaha cu Merca a cambia esaki tabata na januari di e aña aki, ora cu nos a drenta den un di 4 ola super pisa cu cifranan di casonan positivo a aumenta drasticamente surpasando mil caso pa dia. Despues di un luna, esaki a baha atrobe na nivelnan aceptabel, pero Merca a keda mantene e nivel di alerta halto. Den 2021 tambe tabatin un biaha cu Merca a haci mescos, y a tarda basta pa esaki keda ahusta. E nivel a keda por lo menos 3 luna riba alerta di mas halto, pa apenas un luna despues esaki bolbe keda adapta bek pa esun di mas halto.