Warda di Polis di Playa ta operacional na ex-Codemsa pa 2024

ORANJESTAD – E intencion ta 1 di januari 2024, un total di 5 departamento di gobierno ta operacional den loke awor ta conoci como ‘ex edificio Codemsa na morgenster. Asina minister di husticia Rocco Tjon a confirma pa noticiacla den e programa Noticiacla LIVE. Entre nan, lo tin e warda di polis di Playa, CEA, Imigracion, Bureau City Inspector y LAR. Mester menciona cu e warda na Macuarima, pa motibonan operacional ta keda e Centro di Husticia unda cu e Alto Comisario tambe lo ta ubica. 

AVANSA

E proyecto actual di mudamento ta hopi avansa segun e mandatario, den sentido cu e concepto di ley cu tin cu legalisa tur cos, ta cla y a papia cu tur departamento cu tin cu muda pa e edificio, unda cu a haya un indicacion di tur e necesidadnan. A combersa cu APFA, cu ta hincando e ultimo concepto den otro, y a base di e concepto ey, ta contesta e inquietudnan di Raad van Advies, pasobra nan a trece un punto dilanti cu kier wak e proyeccion financiero. “Obviamente bo ta haya e proyeccion a base di e proyecion cu APFA ta traha a base di tur e necesidadnan di e diferente departamentonan cu lo bay eynan” e mandatario a sigui bisa. E parti ey lo ta cla pa mei di e aña aki, pa despues bay Parlamento pa defende e concepto di ley. Unabez cu esey ta cla, pa juni of juli di e aña aki, por cuminsa cu e trabou di reconstruccion di e edificio grandi. Esey lo tuma por lo menos un aña y mei, prome cu tur cos ta cla. 

E NO TA COSTA NOS NADA

E mandatario a bisa cu e gastonan lo ta minimo den sentido, cu lo centralisa huur di tur e edificionan cu actualmente ta wordo usa y paga pa por ubica e departamentonan cu tin cu muda den ex Codemsa. “E uitgangs punt ta cu e mester ta budget neutral”. Manera informa caba, tur e departamentonan menciona, ta pagando huur pa ta den un edificio particular. Esaki ta inclui varios departamento di polis mes. Y varios di e edificionan no ta traha specificamente pa ubica e departamentonan cu ta pone cu no por cumpli cu e necesidad cu e organisacion tin. Pesey a consolidad e huur di tur edificionan. E edificio ‘nobo’ ta haya tur esaki si manera cu mester, cu mas facilidad pa e mesun prijs cu nan ta pagando aworaki. “Ta bay haya mas, pa e suma cu nos ta hayando aworaki”.