Conseho di minister ta aproba presupuesto 2015 awe

ORANJESTAD – Conseho di minister di gabinete Mike Eman 2 tin riba agenda awe pa aproba presupuesto 2015, y laga tur minister firma esaki tambe. Unabes cu esaki keda cla, nan lo por presenta esaki na Parlamento. “Mi ta spera cu lo por haci esaki awe mes” e mandatario a bisa NoticiaCla.com awe. Ta depende ki ora caba cu e proceso y cu parlamento tin tempo pa ricibi e minister cu e presupuesto. “Pero e intencion ta pa e siman aki sigur e keda entrega” Bermudez a priminti.

PROCESO DI PRESUPUESTO

E proceso ta cu unabes cu tur minister firma esaki, e ta nifica cu tur a aproba nan respectivo seccion pa e tin valides. E informacion cu un matutino a bin cune den fin di siman, cu lo tabatin problema cu e firmamento diabierna, no ta cuadra. “Mi no sa unda e informacion ey a bin, pero e no ta corecto. Ta awe nan ta firma. Awe e punto ey ta riba agenda. No diabierna pasa” e mandatario a sigui bisa.

CIFRANAN DI PRESUPUESTO

Segun cifra cu e mandatario ta comparti, e concepto di presupuesto ta mustra un saldo riba e cuenta coriente di 176 miyon negativo, pues si elimina e suma di interes di 200 miyon por mira cu e cuenta coriente ya caba ta mustra un surplus di 25 miyon. E mandatario ta sigui splica cu e presupuesto total, esta e cuenta coriente y e gasto di capital ta mustra un deficit di 123 miyon pa 2015, pues e suma aki hunto cu e suma cu mester pa refinancia e debenan cu ta caduca e aña aki di 183 miyon ta suma na un total di 306 miyon cu mester wordo financia den 2015. Esaki ta representa 3.7% di nos GDP.