Van Huffelen ta bin Caribe otro luna pa atende COHO personalmente

DEN HAAG - Secretario di estado hulandes Alexandra van Huffelen kier consulta cu e tres islanan Aruba, Corsou y St Maarten personalmente otro luna riba e tema di COHO. Asina e la bisa despues di e reunion di Conseho di Minister di Reino diabierna mainta. Segun van Huffelen, no tin sentido pa implementa reforma cu bo no ta kere aden. Esey tabata su reaccion riba e hecho cu tur tres isla a pidi mas tempo pa trata esaki. Nan a haya awor te dia 13 di mei pa entrega nan pensamento.  Esaki ta duna nan e chens tambe pa proximamente discuti esaki entre e islanan durante e reunionan di IPKO na St Maarten. Algo hopi bon segun van Huffelen. Despues e lo sinta cu nan, pa contesta preguntanan cu nan lo tin. “Esaki lo tuma tempo pasobra nos tin cu discuti esaki ampliamente” van Huffelen a sigui bisa. E combersacionan lo tuma lugar na mei y  juni proximo. E lo haci dos bishita y durante esaki, atende e islanan, pues no ta bay atende tur e islanan durante un solo biahe. Potret cortesia Suzanne Koelega