Minister: ‘Nos no ta akinan pa ehecuta loke cu CFT ta dicta’

ORANJESTAD – E hecho cu gobierno no kier cobra e impuesto sugeri pa College Financieel Toezicht (CFT), esta e ‘solidariteits belasting’, no kier men cu gobierno ta pone conseho di CFT un banda. Di otro banda, minister encarga cu finanza, Angel Bermudez a sigura NoticiaCla.com (NC) cu ‘nos no ta akinan pa ehecuta loke cu CFT ta dicta’. Segun e mandatario, nan (CFT) por haci esey na Corsou y na St Maarten. “Pero nan no tin ningun autoridad na Aruba te asina lew cu mi sa. Pero nos ta aprecia nan consehonan si”. Pero ta na e mandatario si e ta acepta conseho di CFT of no. Y si CFT no gusta, e lo splica nan pakico a tuma tal of keda sin tuma tal conseho.

NADA ADICIONAL

E mandatario a splica cu  e ta compronde e pensamento di CFT, pero tanten cu e sistema no ta funciona debidamente, 'no por logra nada, si no tin nada nobo'. “Ni maske cuanto belasting nobo mi hinca den e organisacion, nada mas no ta bay sali adicional” e mandatario a sigui splica. Pasobra segun Bermudez, loke sali adicional, ta bay na costo cu loke tin caba. Mientrastanto a referi na 24 medidanan cu a bisa CFT cu gobierno lo bay ehecuta. Di esakinan, varios ta den ehecucion caba. Fuera di esey, no ta bai tin mas medida. E mandatario a confirma na NC e ora cu e contesta pa CFT ta cu fuera di e 24 medidanan, no tin mas, y esey kier men no tin solidariteits belasting. Loke ta bay haci ta purba cobra e suma di belasting pendiente cu tin riba caya, cu por yega un suma di entre 2.2. pa 2.5 biyon florin. Den e asina yama ‘nader rapport’, riba e conseho di RvA tambe a mustra cu esey lo sosode, enves di e consehonan di CFT. Awor e pakete ta cla.

ULTIMO PALABRA DI CFT

Realidad sinembargo ta keda cu CFT , manera a sosode aña pasa, tin e ultimo palabra. A puntra e mandatario cu si dado caso CFT dicidi atrobe, -manera cu a sosode aña pasa unda cu gobernador no a firma e presupuesto-, kico ta pasa, Bermudez a bisa cu e ta cla pa nan:” When we get so far, we will cross that bridge. Mi ta asumi cu esey lo no sosode pasobra nos a hinca hopi tempo y esfuerso pa traha e ‘naderrapport’ unda cu nos a purba procesa tur recomendacion cu a wordo haci door di CFT y IMF y RvA”. Nota: foto di archivo di CFT na Corsou.