Xander Bogaerts a rechasa extension di contracto cu Boston Red Sox

BOSTON – Aruba su pelotero professional Xander Bogaerts a rechasa un extension di contracto cu Boston Red Sox. E la confirma esaki na reporteronan di Boston Globe diamars. E oferta no tabata uno cu e por a acepta. Mientrastanto temporada nobo a cuminsa, y por lo pronto Bogaerts lo no trata e tema pa no stroba su concentracion riba e wega y tambe pa cu su coleganan. Esey kier men cu pa e resto di temporada Bogaerts lo hunga normal, pero na fin di e temporada, tin chens cu e ta bandona e ekipo ya cu segun su contracto, despues di e tres aña (e la firma su contracto na 2019), e por sali di e contracto. Mientrastanto Boston Red Sox a contrata otro short stop, Trevor Story, cu aworaki lo hunga segunda base, pero ta e alternativa, si Bogaerts dicidi di no continua cu Boston na final di e temporada. E ta algo sigur di lamenta, ya cu Bogaerts a bisa di ta gusta Boston y no kier move. Pero e contracto ofreci, no ta bal su nivel di hugada aparentemente, pa cual e la nenga e oferta haci na dje diamars.