Parlamentario Vallejo evaluando pa cambia trabou pa kaakchirurg

ORANJESTAD – Actual parlamentario pa partido MEP, Arthur Vallejo ta evaluando pa retira como Parlamentario. Den un reaccion cortico pa noticiacla diahuebs, e parlamentario cu di profesion inicial ta dentista specialista, a confirma cu tin combersacionan andando pa e tuma e paso grandi, pa establece su mes como un kaak chirurg (cirujano maxillofacial). Segun Vallejo, recientemente via Arubig e la keda aproba pa traha como kaak chirurg. Pero e tin cu inicia combersacionan cu AZV riba e tema aki ainda. Recientemente e la haci un operacion exitoso di e tema menciona. “  Mi mes ta presidente di comision di Salud y mi ta wak e falta di specialista enorme cu Aruba tin, awor cu e chance a presenta y Aruba ta buscando un kaakchirurg pa añas” Vallejo a sigui bisa. Y e ta mira tur e placa cu ta bay afo. Mucho mas e no kier a bisa, debi cu e combersacionan tin cu tuma lugar ainda. Y despues e por bisa mas. Pero e portal aki a haya e tip aki cu tin plan pa esaki tuma lugar y cu den partido a cuminsa prepara caba pa esaki eventualmente. E dentista specialista cu actualmente ta parlamentario, tin un estudio medico universitario di 9 aña tras di lomba y kier eherce su funcion awor cu e chens a bin y a mustra cu e no por eherce dos funcion pareu. Den e tempo nos dilanti, lo tende mas riba e tema aki.