Wever: Despues di Juli lo por kita ATV’s y UTV’s for di caminda publico

ORANJESTAD – Despues di luna di juli 2022, lo por baha tur UTV’s y ATV’s for di caminda publico. Asina por a compronde di prome minister Evelyn Wever durante cu e tabata contesta preguntanan diamars durante reunion di Parlamento pa loke ta presupuesto 2022. Segun e mandatario, pa 6 di juli 2022, Directie Natuur & Millieu (DNM) lo entrega un rapport final cu un ruta alternativo cu e vehiculonan por usa, envez di caminda publico. Esaki pasobra mester trata cu varios stakeholders ainda kico tur por y no por, y cua rutanan lo wordo usa y ki efecto esaki tin pa esnan cu ta den besindario di e rutanan aki. Como tal, a pidi pa no aproba e mocion presenta pa parlamentaria Marisol Lopez Tromp, cu ta pidi pa baha e vehiculonan for di caminda mesora. Y despues cu haya e conseho, por actua riba dje y implementa e regla nobo. 

PROBLEMA DI VEHICULO

E problema cu e vehiculonan aki, ta cu e forma con ta maneha esaki den tereno specifico, e ta daña esaki y naturalesa. Pero legalmente no por yega kita nan for di caminda, pasobra tin ‘toezegging’ haci, y leynan cu ta permiti e vehiculonan aki pa ta riba caminda. Y mester duna un periodo di transision segun e mandatario, pa kita e vehiculonan for di e camindanan cu nan ta coriendo awor, cu ta practicamente tur caminda.