Aruba a pidi Hulanda mas tempo pa trata COHO Y RAFT

ORANJESTAD – Parlamento di Aruba oficialmente a haci peticion na Hulanda pa mas tempo pa trata e ley di COHO y pa e ora entrega nan ‘relato’ riba e ley. Asina presidente di Parlamento Edgard Vrolijk a confirma pa noticiacla dialuna mainta. Hunto cu Aruba, Corsou y St Maarten tambe a haci e mesun peticion. “Hunto (nos) a pidi pa mas tempo pa entrega di e verslag cu mester a tuma lugar 20 di april(proximo)”, Vrolijk a cuminsa bisa. “Pero di nos parti nos ta bezig cu presupuesto, y awo cu caba nos lo dedica na e Coho internamente” e presidente a sigui bisa. 

MAS TEMPO 

Segun Vrolijk, a pidi pa por entrega e relato te dia 17 juni 2022. Pa loke ta e ley di RAFT tambe a pidi mas tempo y aki tambe e fecha ta 17 di juni 2022. E fecha cu Hulanda inicialmente a duna Aruba, no ta yega Aruba pa cumpli pues. Dia 6 di April proximo, esta diaranson, Hulanda ta duna su contesta si ta aproba e fecha solicita pa entrega e relato, of si ta duna otro fecha. 

TARDANSA

Ta conoci cu Hulanda no ta mucho contento cu e tardansa for di comienso caba, y ta alega cu e islanan (incluyendo Aruba) tabata tarda den tur sentido cu e proceso, y cu esaki tabata crea irritacion. Tabata usa tur tipo di ‘excusa’ segun fuentenan di e portal aki ta bisa, y tambe e colegio di supervision financiero CAFt tabata alega cu mester stop di bin cu excusa pa cumpli cu acuerdonan entre e dos paisnan.