Caso di 'drive-by shooting' den Korvetstraat

ORANJESTAD - Dialuna marduga algo pasa di mey anochi a tuma lugar un ‘drive by shooting’ den Korvetstraat, mesora ta manda pidi presencia di polis na e sitio. Na yegada un dama a splica polis cu e tabata bayendo pa subi su auto un Suzuki Celerio ora cu di pabou e la mira un auto cende su lus y cuminsa bin den su direccion. Na momento cu e auto aki, un Toyota Tercel, a yega cerca, for di den e auto desconocinan a los algun tiro den direccion di e auto di e dama. E dama a scucha 5 pa 6 tiro y e auto a sigui bay. E tironan a alcansa no solamente e auto di e dama, pero tambe dos otro auto cu tabata para na e momento ey den e caya aki. Polis a cera e area y a marca unda tur a haya huls. Despues di un rato departamento tecnico a bay na e sitio y a cuminsa cu un investigacion. Na dado momento a drenta un informe di un Toyota Tercel mesun color a wordo mira ta actua sospechoso den Seroe Patrishi. E caso di Drive by shooting aki ta den man di autoridad pa mas investigacion.