Mariniernan prepara si disturbionan na Venezuela afecta Aruba

ORANJESTAD - Mariniernan na e base na Savaneta ta prepara en caso posibel disturbionan di Venezuela afecta Aruba. Esaki e hefe mas halto di marina real, teniente general Rob Verkerk a declara e fin di siman aki den un revista militar hulandes. E hefe militar ta referi na e situacion menasante ‘apenas 25 kilometer leu di e costa di Aruba’. 'E grupo di mas of menos 200 marinier, ta cla pa ‘à la minute’ saca ciudadanonan di Reino Hulandes for di Venezuela'.  E hefe militar a referi tambe na e menasa di un posibel golpi di estado den e pais bisiña, den e revista di marina ‘Alle Hens’. Mes momento, ta conoci tambe cu e fin di siman aki Venezuela su armada a cuminsa un serie di entrenamiento di 10 dia pa 'prepara' pa un posibel 'invasion di Merca.  Esaki a consisti di despliege di militarnan na cierto parti di e pais latino, y entrena cu misil y defende e refineria di un atake simula. Y tambe e presidente venezolano a haya podernan extra pa goberna e pais pa e proximo 9 luna. 

ALERTA AUMENTA

Pa loke ta e alerta cu e general hulandes ta referi na dje, e ta bisa si mes momento, cu e no ta papia di un 'aumento' di alerta. Algo cu e hefe halto di marinierskazerne Jan ten Hove a confirma na NoticiaCla.com. E hefe di marinierzkazerne la confirma e contenido di e articulo, incluyendo e parti cu no tin un aumento di alerta. "Henter e storia y ponencia ta cuadra. Tambe e parti cu no tin aumento di alerta" ten Hove a sigura NC. E articulo ta papia di e tension na Venezuela. Entre nan e intento fracasa di un golpi di estado, e medidanan recien di presidente mericano Barack Obama, y mas. 

TRABOU DI KAZERNE

Mariniernan hulandes na Aruba ta co-coresponsabel pa e defensa di Reino y e mantencion di e seguridad den region. Como parti di esaki, nan ta participa na ehercicionan pa combati droga den e region. “Nos ta operando nos programanan di entrenamiento regular” e hefe halto a bisa. Nota: foto ta di archivo di un entrenamiento recien di marina na Aruba.