KPA: Pakico polis cu a causa accidente mortal, ta liber

ORANJESTAD –E hecho cu a laga e polis chauffeur, - esun a causa e accidente mortal di e hobencita Zinnia Croes diabierna-, den libertad, a causa hopi conmocion den comunidad. Rednan social tabata yen di critica y comentario riba e hecho aki. E comentarionan tabata di tal forma cu Cuerpo policial mesora a dicidi pa ‘aclaria’ cierto speculacion y puntonan cu lo ta ‘mal interpreta’, den un comunicado. Entre otro a splica cu ‘e autoridad cu ta dicidi riba detencion y encarselacion ta Ministerio Publico’ y no polis. Tambe a splica tambe a base di kico a laga e polis den libertad, despues cu a detene na prome instante. Esaki no a kita e rabia den comunidad, cu ‘lo ta midi cu dos midi’ ora di detene hende cu a causa un accidente ‘cu resultado fatal’.

TRANSPARENCIA E IMPARCIALIDAD

Cuerpo Policial a cuminsa sinembargo na purba splica, -cu intencion di kita tur duda-, cu diabierna na e sitio di accidente a constata cu e chauffeur di e auto cu a alcansa e hobencita, ta un polis. ‘Pa por garantisa transparencia y imparcialidad, a manda yama tur autoridad competente, incluyendo Alto Comisario di polis, cu a presenta na e sitio pa pone su mes na altura di e sucedido’, e comunicado a sigui bisa.

DETENCION INICIAL DI E POLIS

‘A interoga e sospechoso, a detene y haci un test cune di rosea, cu a confirma cu e tabata bou di influencia di alcohol’. Y na final, e comunicado ta mustra cu e investigacion ta continua awor, bou direccion di Ministerio Publico.

CAMBIO DI LEY

Segun Cuerpo policial, nan tambe ta confrontando un cambio haci den leynan penal, den cual a baha e castigo pa causa accidente bou di influencia di alcohol di 4 pa 3 aña. E cambio a pone cu Fiscal no por duna ordo pa detene un sospechoso asina y encarcel'e te dia e caso bini dilanti Corte. Esey ta posibel solamente den delitonan cu tin un castigo di 4 aña of mas. ‘Dicon a cambi'e, no ta conoci’ segun Cuerpo policial. Mando policial a atende e asunto aki caba cu e instancianan concerni. Na final KPA a desea e famia di e victima forza cu e perdida grandi aki.