Moneda euro a casi yega nivel di dollar mericano

AMSTERDAM – E balor di e moneda europeo Euro, a sigui cay ayera, compara cu e dollar mericano. Cu esaki ta prome biaha cu e moneda europeo desde januari 2003, ta cay bou di 1,05 dollar. Na Aruba esaki ta un noticia positivo sigur pa esnan cu kier haci negoshi cu Europa ya cu e ta sali nos mas barata. Specialmente ex studiantenan cu tin cu paga nan debe y studiantenan cu ta sera prestamo nobo.

CAMBIO DI CURSO

Na ciere di e bolsa di balor europeo diaranson, e euro tabatin balora na 1,0574 dollar ainda. Pa diahuebs 5’or esaki a bira 1,-495 dollar. Rond di 6:40pm, a papia di un recuperacion leve di 1,0518 dollar.

Ultimo biaha cu e moneda europeo tabata balora menos cu e dollar, tabata na december 2002. Dia 6 di december 2002 tabata ultimo biaha cu e euro y dollar tabatin e mesun balor.

INTRODUCCION EURO

Tabata na comienso di 1999 cu e euro a wordo introduci na 19 pais europeo riba un tarifa di 1,1747 dollar pa despues na october 2000 yega na e punto mas abou di 0,82 dollar pa euro. E balor mas halto cu e euro a yega tabata riba 15 di juli 2008. E momento ey, e euro tabata balora na 1,6038 dollar. E ultimo 3 añanan e balor a fluctua entre 1,20 y 1,40 dollar.

MOTIBO DI FLUCTUACION

Motibo di e fluctuacion di e euro ta debi na e presion di e maneho monetario den zona euro y Merca. Banco Central Mericano Europeo (ECB) a pone pasonan nobo e siman aki pa stimula e economia latente y inflacion. Na Merca, e Banco Central ta netamente haci lo contrario door di limita e incentivonan economico mas ainda, pa cual e dollar ta bira mas y mas atractivo pa inversionistanan.