Hobencita victima di accidente a fayece awe tardi

ORANJESTAD - E hobencita di 12 aña, Zinnia Croes, cu a keda alcansa pa un auto ayera nochi, a fayece awe merdia a consecuencia di e heridanan ricibi y bira e di 2 morto di trafico pa 2015. For di momento di e accidente ayera nochi, tabata conoci cu su situacion tabata hopi grave y cu e tabata bringando pa su bida. Prome cu mei anochi, e la te hasta haya santa olio. Awe mainta a haci testnan cune atrobe, y tabatin indicacion cu e tabata clinicamente morto caba. Riba rednan social, mensahe di forza a cuminsa drenta y esaki tabata basta impresionante. For di momento cu e noticia di e accidente a plama, practicamente henter e isla tabata convivi e momentonan, resando y mandando mensahe di oracion. Pero mes momento tambe awe den dia,  na varios momento, noticianan incorecto a cuminsa plama cu e lo a fayece. Tur esaki a keda desmenti pa e famianan mesora. Pero toch pa algo despues di 2'or, e noticia oficial a drenta cu e la fayece lamentablemente. Mesora atrobe, mensahenan a cuminsa plama di tristesa riba rednan social, y a cuminsa plama e noticia tristo aki.  

E ACCIDENTE

Tabata algo prome cu 7'or y mey, cu polis a bay Spaans Lagoen cu urgencia, un poco pariba di Mangel Halto unda e prome informacion tabata cu un colega polis (na civil) lo a dal un mucha cu auto. Na yegada enberdad polis a topa cu nan colega y a bin compronde cu e colega tabata biniendo di pabou bayendo pariba. Na dado momento un mucha muher di 12 aña a sali subi caminda su dilanti. E hobencita tabata cana cu algun amiga di barrio y pa un of otro motibo a subi caminda sin pone tino cu di pabou tabata biniendo e auto. E impacto fuerte ta dal e hobencita benta riba e hood di auto, y algun meter mas dilanti e hobencita a cay for di riba e hood di auto. E hobencita a keda gravemente herida. Mesora a pidi ambulance cu hopi urgencia na e sitio. Su tata cu ta un trahador (verpleger) na hospital, mesora a sali pa yuda su yiu. Personal di ambulance mesora a trata e hobencita na e sitio, pa despues cu dos ambulance tras di otro nan sali rumbo pa hospital. Polis a coopera cu ambulance pa cera tur crusada pa asina nan por a yega hopi lihe na hospital. Na hospital e mama y demas famia di e criatura tabata wardando, y e tata a acompañado su yiu muher den ambulance. Na yegada na hospital e personal di Poli a sali mesora pafor pa encontra e ambulance y asina tuma e hobencita di 12 aña over. Na hospital e mediconan tabata luchando pa scapa e hobencita su bida. Na e sitio di accidente a presenta e departamento tecnico di polis pa hasi mas investigacion y e caminda a keda pa basta rato cera. E dama agente policial cu a dal e hobencita a keda hopi down, y tabata yora na e sitio mientras su coleganan ta hasiendo mas investigacion. Slachtofferhulp a wordo pidi pa atende cu famia di e victima na hospital. Zinnia ta laga atras su tata Gibi, mama Michella y ruman homber grandi Zennon (13). NoticiaCla.com ta manda palabra di condolencia pa e famianan di Zinnia. Y cu Zinnia sosega na paz.