Consternacion riba color di bandera di Aruba aclarea

ORANJESTAD – Faltando menos cu un siman pa Aruba celebra su dia di Himno y Bandera, tin e discusion ‘politico’ atrobe si e color ta esun corecto, y si e bandera cu su color pa ley aña pasa a wordo oficialisa, ta e color real di e bandera. Mientras cu e mandatario encarga cu cultura Otmar Oduber ta lamenta e forma con oposicion ta hibando e campaña aworaki, MEP ta pidiendo su miembronan pa ignora e bandera ‘nobo’ y uza solamente e bandera cu e color manera e tabata na 1976. Algo cu por bira un problema mirando cu pa ley, e color specifico ta esun cu realmente ta legal. No ta conoci si pa colga bandera cu color ‘robes’ tambe ta contra ley.

CARGACION ROBEZ

Investigacion cu NoticiaCla.com a haci, y a confirma esaki cu e mandatario encarga, ta cu na 1975 ora cu a oficialisa e bandera di Aruba y su color e tempo ey, e color cu nan a marca, tabata esun cu ta hiba e nomber larkspur. Esey ta e color di e bandera cu aña pasa a keda oficialisa. Pero e problema ta cu e bandera cu a wordo hisa pa prome biaha na 1976, ta esun robes. E cargacion di e prome banderanan cu a bin for di exterior pa e evento, no tabata e cargacion corecto. E compania cu a imprimi esaki, a ekiboca di color y a manda esun robes. Asina mes gobierno e tempo ey, a uza e bandera ey mes y a lante cu tur orguyo.

BRUHA NUMBER

Ora di compara e color via e forma di colo, esta pantone, a ripara cu e cargacion di bandera di Aruba cu a bin for di Haiti, su color tabata ‘pantone 297 C’, siendo cu e mester tabata pantone 279 D. Pues e compania na Haiti a bruha e numbernan, cu e resultado conoci. Esey ta e loke a sosode cu tur e añanan, a keda uza e bandera ‘robez’ y esey a ‘transforma’ su mes den un custumber sentimental.

CUSTUMBER

Ora cu a confronta e mandatario di cultura cu esaki, e la mustra cu e no por cambi’e y adapta esun cu ta fout y lague numa, pasobra e la bira e ‘custumber’. Si e haci esey, e lo ta bayendo contra e ley di 1975, cu a stipula e color corecto di larkspur, of United Nations Blue (cu no ta existi mas), pues ta mantene e color corecto y cu tur hende lo tin cu adapta nan mes cu esaki. No ta cuestion di custumber sino mas bien conforme di ley.

CONSEHO DI COMISION

E mandatario a sigura tambe cu gobierno actual a sigui e conseho di 4 comision cu durante 18 aña tabata contene miembronan di e tempo ey tambe, pues cu tin signature tanto di MEP como AVP. Y nan a sugeri pa esaki. Esey no ta kita afor cu a surgi un confusion tur e añanan atras, pero esaki a keda simplemente na e confusion y no a haci nada ‘activamente’ pa coregi e asunto aki.