Wever: Watersports na Aruba no por ta ‘business as usual mas!”

ORANJESTAD – E negoshi di deporte acuatico na Aruba no por ta ‘business as usually’ mas. Asina prome minister Evelyn Wever a bisa durante un conferencia di prensa dialuna mainta, refiriendo na e accidente tragico cu a cobra bida di un hobencita turista Mericano siman pasa ora cu un boto a pasa riba dje, cu consecuencia fatal. Ta su prome reaccion publico riba e suseso lamentable aki. E mandatario a bisa cu tanto polis como ministerio publico ta haciendo un investigacion rigoroso riba e caso y unabez cu tin mas informacion, lo divulga esaki. Pero e la adelanta cu cos no por sigui mescos mas, indicando cu por spera cambio riba e tereno di deporte acuatico, pa asina evita accidentenan asina. “Nos mester ta extra cauteloso” e mandatario a sigui bisa.

BISHITA

E mandatario a informa tambe cu e mes a bishita e famia di e hobencita personalmente, prome cu nan a biaha bek pa Merca den fin di siman. Detayes di e bishita no ta conoci, pero solamente e mandatario a sigura cu e famia a keda agradeci cu e atencion cu nan a haya. Y tambe obviamente cu e famia ta hopi kibra pa e loke a sosode.