A recauda casi 20 mil dollar pa famia di victima di accidente di boto

ORANJESTAD/BOSTON – E recaudacion di fondo pa entiero di famia di e hobencita Mericano cu a fayece tragicamente siman pasa na Aruba, a logra surpasa su meta den apenas 24 ora. Tabata siman pasa cu un persona Mericano,Ken Grille di Plymouth, cu propiedad na Aruba a dicidi di acerca famia Cassidy despues di e tragedia, y despues a dicidi di lanta e pagina conoci como un pagina GoFund cu ta permiti hende deposita fondo. Den apenas 24 ora a logra colecta casi 20 mil dollar, siendo cu e meta tabata 10 mil.

TRAGEDIA

Manera ta conoci, siman pasa diaranson un damita Mericano turista riba nos isla, a perde su bida tragicamente, ora cu un boto a pasa riba dje despues cu e la cay di un tube, durante un paseo acuatico dilanti hotelnan highrise na Palm Beach. Despues di intento exaustivo di personal di ambulance, toch no a logra salba bida di e damita aki, Cassidy Murray, cu a bin fayece despues a consecuencia di su lessionan ricibi.