Segun de Meza, Web a tuma un postura terco contra dje

ORANJESTAD – E relacion entre minister di utilidad Mike de Meza y gerencia di WEB no ta nada bon. Esaki e mandatario mes a confirma na NoticiaCla.com ayera, y a duna ehempel di esaki. Segun e mandatario, WEB ta tumando un postura ‘terco’ contra dje y no ta cooperando cu dunamento di informacion manera cu e la pidi.

CAMBIA CONCESION

E mandatario a splica p.e cu e mester a cambia e concesion di electricidad cu WEB tin, pa e por a haya mas informacion. “Ora cu mi a cambi’e y a hinca den dje cu e concesie houder tin cu duna informacion (gevraagd en ongevraagd) na e concesie verlener, WEB a hiba gobierno Corte”, de Meza a cuminsa splica. Cu otro palabra, WEB no kier a cumpli cu su peticion.

TAPA PRIJS

Despues ora cu e mandatario a puntra WEB kico e prijs di gas ta cu nan lo paga ECO gas pe, (e pregunta a wordo haci na dje den parlamento pero segun e mandatario, nunca e no a haya e rapport), a wordo nenga pa manda e prijs pe. “E ora mi a exigi pa mi haya e contract. Mi a haya e contract manda pero unda cu e prijs ta, nan a hacie preto y kita e prijs. Klopt toch niet?” e mandatario ta sigui bisa.

EXIGI CONTRACT

E mandatario e ora a manda un carta pa WEB, exigiendo pa e haye dentro di 24 ora. “Te dia di awe mi no a haya e contract. Esaki ta casi un luna pasa” e mandatario a sigui bisa. E ta mustra cu ta e tipo di practica aki no por sigui.

WEB A FAYA

Mes momento sinembargo, ora cu NoticiaCla.com a puntra e mandatario si e ta haya cu WEB a faya, e mandatario a bisa cu segun e ‘decisionnan por a wordo tuma miho’. Ainda e ta ocupa cu e analisis y como tal no por bisa exactamente si e compania a faya of no. “Ami ta bisa cu decisionnan cu nan a tuma, no necesariamente ami lo a tuma den e forma ey. Mi no ta di acuerdo cu na momento cu bo ta mira cu prijsnan ta bay abou, anto bo ta mira kico e mercado ta haciendo, cu bo ta sera un contract di full un aña (pa hedging). Anto den un siman bo ta firma un otro contract pa e siguiente aña, sabiendo cu e prijsnan ta sigui bay abou. Mi no sa si esey tabata mucho efectivo. Nos ta analisando esey awor” e mandatario a finalisa bisando.