Utilities NV a confirma Alfredo Koolman como director nobo di WEB

ORANJESTAD – Manera cu Noticiacla a presenta siman pasa, e siman aki, Utilities lo a informa oficialmente di e cambio di director na e planta di awa, WEB Aruba NV, esta sr Alfredo Koolman. Y esey a sosode cu e comunicado diaranson atardi. Segun e comunicado, sr Koolman ta drenta den servicio di WEB como su director, entrante 15 di mei proximo.  

INTRODUCCION

“Nos ta introduci Sr, Alfredo Koolman, un ingeniero di formacion, cu su titulo di Master den Ciencia, kende desde 2013 a maneha WEB Bonaire” e comunicado ta cuminsa bisa. “Anteriormente, Sr. Koolman tabata empleado di WEB Aruba den diferente posicion clave manera Division Manager Maintenance y Division Manager Waterdistribution”. Sr. Koolman a traha na Hulanda tambe den mesun ramo. Un candidato cu experiencia amplio cu a resulta e miho den e proceso y scrutinio pa proximamente bira e Director General di WEB Aruba.

PROCESO TRANSPARENTE

Utilities NV ta sigura cu e proceso tabata uno transparente, cu avisonan den nos corantnan local. Tabatin un total di 22 persona cu a reacciona riba e aviso, pero Sr. Koolman ta esun cu a resalta y sobresali den henter e proceso di reclutamento y seleccion. Utilities y WEB Aruba ta gradici Sr. Koolman pa asumi e reto mirando cu e ta lagando atras un bon trayectoria na WEB Bonaire, pa bin aporta na e desaroyo di nos compania estatal cu awor ta den e proceso di transformacion pa cambio di energia sushi pa energia limpi LNG rumbo Hydrogeno. 

GRADICI

Utilities y WEB Aruba a gradici Sr. Laty Wever enormemente pa a acepta e reto y a asumi responsabilidad di WEB Aruba N.V. kende a sa di maneha e planta aki di un manera admirable durante su gestion. Awor un era nobo ta inicia pa WEB Aruba N.V. “Nos ta desea Sr. Koolman hopi exito den su gestion como e director nobo di nos planta nacional di awa y energia WEB”.