Bermudez: Otro siman Parlamento ta haya presupuesto 2015

ORANJESTAD – Dialuna awor presupuesto 2015 lo wordo entrega na parlamento. Esaki minister di finanza a bisa NoticiaCla.com diabierna atardi. No ta conoci si ki dia ta cuminsa cu e tratamento di esaki. E prespuesto mes, a keda entrega na e mandatario awe, door di hefenan di Directie Financien y DWJZ. Tambe minister Dowers tabatey pa e entrega.

TARDANSA

E tardansa di e entrega ta debi cu tabatin un procedura entama a base di e conseho di College Financieel Toezicht (CFT) cu a pone cu mester a traha un presupuesto supletorio 2014. E ora e mandatario a dicidi di busca esun entrega 2015 bek, pa adapta esaki cu su cambionan necesario

CFT Y RAAD VAN ADVIES

Na december 2014, e mandatario a manda e concepto di 2015 pa Cft pa un conseho di cual a ricibi esaki for di Cft pa dia 30 di December y a continua pa entrega esaki na Raad van Advies (RvA). Despues di a ricibi e consehonan di RvA dia 24 di Februari, e siman cu a pasa e concepto aki a wordo finalisa tumando na cuenta tanto e consehonan di RvA como tambe Cft mientras tanto lo entrega esaki na parlamento e siman venidero.

SALDO

Segun cifra cu Minister Bermudez ta comparti, e concepto di presupuesto ta mustra un saldo riba e cuenta coriente di 176 miyon negativo, pues si elimina e suma di interes di 200 miyon por mira cu e cuenta coriente ya caba ta mustra un surplus di 25 miyon.

PRESUPUESTO TOTAL

E mandatario ta sigui splica cu e presupuesto total, esta e cuenta coriente y e gasto di capital ta mustra un deficit di 123 miyon pa 2015, pues e suma aki hunto cu e suma cu mester pa refinancia e debenan cu ta caduca e aña aki di 183 miyon ta suma na un total di 306 miyon cu mester wordo financia den 2015. Esaki ta representa 3.7% di nos GDP.