Entrante 2 di mei ta implementa ley pa limita benta y uzo di producto di tabaco

ORANJESTAD – Entrante 2 di mei proximo ta drenta na vigor e ley di tabaco cu ta limita grandemente e benta y uzo di e.o sigaria na Aruba. Esnan cu viola esaki, lo por haya un multa di entre 250 florin pa 100 mil florin, cu ta mayoria biaha pa negoshinan cu ta viola e ley aki. Minister di salud Dangui Oduber a haci anuncio dialuna durante conferencia di prensa pa anuncia e introduccion di e ley aki. A mustra cu den casino lo tin excepcion pa humamento, pero cu esaki lo ta den un lugar specifico. 

PROHIBI HUMA DEN LUGARNAN PUBLICO

Entrante e fecha menciona,(art 2) lo prohibi pa huma den lugarnan publico ta encera e.o. scolnan, area di recreacion, lugarnan di come cu tin area di sinta pafo y bushalte. Tambe ta prohibi (art 2a) pa huma den transporte priva ora cu tin menor di edad den auto. Ta sigui cu (art3) doñonan di trabou ta responsabel pa proteha nan empleadonan for di huma di sigaria durante orario di trabou y riba tereno di trabou. Tambe ta prohibi pa huma den tur transporte publico. No por huma den bus grandi y chikito, den taxi, of cualkier otro forma di transporte publico. 

BENTA

Articulo 5 ta prohibi pa bende of duna producto di tabaco den cierto instancia. Ta trata di instancia di gobierno, medico, cultura y arte, instancia deportivo y instancia educativo. 

BENTA BOU DI 21 AÑA

Articulo 6 ta prohibi benta di producto di tabaco na persona bou di 21 aña di edad. Articulo 6.3 ta bisa cu mester tin un borchi cu ta bisa cu ta prohibi pa bende sigaria na menor di 21 aña. Y tambe menor di 21 aña cu ta traha, no por bende producto di tabaco. Y sigaria mester ta poni na lugar cu no ta acesibel directo pa publico. 

BENTA DI CIGARIA LOS

Un cos cu ta hopi usual ta cu hende ta cumpra sigaria los. Articulo 6A ta prohibi esaki entrante 2 di mei proximo. Pues no ta bay permiti benta di sigaria los y nan mester bende sigaria solamente den pak cera y seya. 

CAMPAÑA

A anuncia cu lo bin cu campaña rigoroso contra e uso di productonan di tabaco, yama ‘Conscientisa, Educa pa Activa” y lo presenta esaki na stakeholders, tene media tour, bin cu programa balansa etc.