Prome mericano a haya declaracion ‘van rechtswege’ di DIMAS

ORANJESTAD – E prome mericano a haya su declaracion ‘van rechtswege’ otorga pa DIMAS awe. Ta trata di Sra. Wade cu tin e nacionalidad Mericano y cu tin mas di 5 aña consecutivo legal cu permiso di residencia aki na Aruba.

HURISPRUDENCIA

Manera cu NoticiaCla.com a informa den forma di exclusividad algun tempo pasa, na luna di december 2014, corte di Husticia Comun di Caribe Hulandes den un otro caso na St Maarten, a dicta cu tur ciudadano di nacionalidad Mericano mester haya igual trato cu e persona cu nacionalidad Hulandes riba asunto di nan estadia legal. Esaki ta basa riba e Tratado di Amistad, comercio y navegacion entre Reino Hulandes y Merca y principalmente basa riba e articulo 3 di e protocol cu ta pertenece na dje y cual aplicabel pa e Partinan di Caribe Hulandes. Consecuentemente dia 2 di februari 2015 Minster Sevinger a anuncia den media e cambio den su maneho di admision pa cu e migrante cu nacionalidad Mericano residencia aki na Aruba.

CAMBIO DEN MANEHO

E maneho di Minister ta ensera cu personanan cu tin nacionalidad Mericano cu por comproba cu nan tawata tin un estadia legal cu permiso pa cinco aña consecutivo na Aruba, por acudi na DIMAS pa pidi pa un declaracion unda ta keda constata cu nan a obtene un status di "van rechtswege" basa riba e hurisprudencia ariba menciona. E persona cu haya e constancia di van rechtswege toelating aki no mester mas di sigui pidi anualmente pa un permiso di estadia temporal pa por biba y/of traha aki na Aruba. Cu e constancia obteni for di DIMAS, e persona di nacionalidad Mericano ta liber pa biba y traha na Aruba sin limitacion alguno.

Kico e persona mester haci y entrega na DIMAS pa obtene e declaracion aki?

A. E peticion por ser entrega sin cita ("walk in" costumers)

B. Ora di entrega e aplicacion mester trece cu ne:

         1. Formulario di aplicacion pa declaracion y copia

         2. Lista di rekisito pa declaracion segun "3 F" y copia

         3. 3 potret (paspoortformat)

         4. Extracto di Censo di Afl 10,--

         5. Extracto di Censo di Af 5,--

DIMAS ta contesta e aplicacion pa un declaracion dentro di un termino di 6 siman.

OTRO AHUSTACIONNAN DEN MANEHO

Otro reglanan cu ta aplicabel pa e persona cu tin nacionalidad Hulandes ora ta trata admision, ta tambe aplicabel pa e persona di nacionalidad Mericano. E persona cu nacionalidad Mericano, no mester paga un deposito ora di haci peticion pa un permiso. Tambe e persona cu nacionalidad Mericano cu ta bin Aruba pa establece su mes pa traha, lo mester pasa un screening di mercado laboral di DPL ora su promer peticion. Si no tin cambio (ni den funcion of dunador di trabou), e persona ta haya exoneracion di e declaracion di DPL pa e siguiente peticionnan pa permiso di estadia di trabou . E mesun reglanan cu ta aplicabel pa e persona di nacionalidad Hulandes ora di reunificacion di famia, ta aplicabel tambe pa e famia di e persona cu nacionalidad Mericano. Pa mas informacion referente e cambionan di maneho aki riba menciona, por subi riba website www.dimasaruba.com of tuma contacto cu DIMAS.