Na Corsou a reconstrui accidente cu morto riba brug Juliana den weekend

WILLEMSTAD - Hustamente 1 siman despues di un aksidente ku Morto riba Brùg Juliana, outoridatnan a bai na e sitio pa por realisá e investigashonnan nesesario. Siman pasá djasabra dia 13 di mart, Kòrsou a konosé e di 5 morto den tráfiko. Un hóben motosiklista, personal di defensa, a fayesé durante e aksidente aki.

For di investigashon preliminar ku polis a realisá na e sitio, a sali na kla ku shofùr di e motosaikel pa motibu te ainda deskonosí i ku ta bou di investigashon, a bai dal parti patras di e outo di famia i lastimá su mes seriamente. A kuminsá ku trabounan di reanimashon na e sitio i despues a transportá e víktima ku urgensia pa departamentu di emergensia di CMC. Alrededor di dos or di mardugá, Sentral di Polis a risibí notifikashon ku e víktima a fayesé a konsekuensia di e múltiple heridanan ku el a sufri den e aksidente prinsipalmente na altura di su kabes.

Djasabra último ku tabata 1 siman ku e aksidente aki a tuma lugá, i tambe riba e mesun dia ku a hiba e víktima na su último lugá di sosiegu, personal di Departamentu di tráfiko i tambe KMar ku ta enkargá ku e investigashon, a bai na e sitio. Nan a sera brùg parti di Punda pa bai Otrobanda, kaminda e aksidente a tuma lugá, pa asina por a hasi e investigashonnan nesesario. Por a tuma nota ku nan tabata midi nèt kaminda e aksidente a tuma lugá. NOTA: E articulo ta scirbi na Papiamento fonetico di Corsou.