Fluho di yegada di mas di 13 mil turista e weekend aki a cana bon

ORANJESTAD –  E fin di siman aki Aruba a ricibi no menos cu 13.103 turista, di cual mayoria atrobe tabata di Merca. Noticiacla tabata presente na aeropuerto y a mira cu e fluho di e miles di turista yegando pareu, no a causa e congestionamento acostumbra, particularmente na salida cu rijnan largo ora di yegada. Minister di Turismo Dangui Oduber a confirma pa e portal aki cu enberdad a haci un planificacion pa asina tur cos cana 'smooth', y enberdad por a mira for di momento cu e pasaheronan tabata ricibi maleta, nan tabata sali sin problema pafo, sin pega. Y cu e hecho cu a flexibilisa e ‘inreisbeleid’ pa cu Covid19 entrante diasabra ultimo, esaki a nifica cu no mester a presenta prueba negativo di Covid19 ni un prueba di vacuna. Pero e seguro si ainda ta vigente. Den e tres dianan esta 18, 19 y 20 di maart a yega 13.103 turista na nos aeropuerto, esaki ta sin conta e 4 barconan crusero cu tambe tabata mara den nos waf riba e 3 dianan aki.  

TURISTANAN MERICANO

Riba diabierna a yega un total di 3588 turista via nos aeropuerto di cual 2966 tabata procedente di Estados Unidos. Diasabra a yega un total 5725 turista Aruba di cual 4816 tabata procedente di Estados Unidos y diadomingo un total di 3790 turista di cual 3095 turista tabata Americano. Estados Unidos ta keda Aruba su mercado di mas importante, pesey semper ta keda monitoria e ruta nan aki di serca. Segun minister di turismo Dangui Oduber, 2022 ta proyecta un recuperacion di entre 85 pa 100% di turismo compara cu 2019 cu ta wordo considera como e miho aña turistico.