Na Corsou Shalton Hato ta bira proximo minister di husticia

WILLEMSTAD – For di fuentenan verídiko, Extra a keda informá  ku “screening” di Shalten Hato pa Minister di Hustisia ta kla i ku mañan djabièrnè Hato lo huramentá. Hato ya a traha kaba riba su  gabinete ku lo bira un gabinete fuerte ku vários abogado di nòmber. For di siman pasá Extra a haña indikashon konkreto ku tur kos ta kanando positivo pa ku “screening” di Hato i asta a haña nòmber di esnan ku lo bai forma parti di su gabinete.

Ora a bira konosí ku Eduard Braam no ta ministeriabel, despues ku korte a duna su veredikto, Partido MFK a postulá Hato komo nan kandidato pa bira Minister di Hustisia. For di tempran, tabatin un bon sintimentu pa ku e kandidatura aki i no tabata ferwagt niun komplikashon pa ku su “screening”.Esaki a resultá di ta asina tambe i e “screening” a sali bon i manera menshoná, tur kos ta indiká ku mañan djabièrnè mes Hato lo hura. For di nos fuente Extra a komprondé ku e gabinete ku Hato a prepará, ya vários a duna nan palabrá di lo forma parti di e tim.

Manera menshoná, lo tin abogadonan konosí i di nòmber ku a kosechá éksito den nan trabou komo abogado ku lo forma parti di e gabinete di Hustisia. E hefe di gabinete lo ta un abogado hende muhé. Un di e konseheronan lo ta un persona ku tin un funshon haltu (manager preventie en bescherming) na un kompania renombrá. E hurista den e gabinete, ta un persona bon den leinan atministrativo i tin añanan trahando den e aparato gubernamental. Ta trata di un persona ku anteriormente a traha pa un ofisina di notario. Extra a komprondé ku e Minister di Hustisia nobo a pidi Thode keda komo konsehero mirando su eksperensia.

Hato den pasado tabata traha pa e bufete di Soliana, Bonapart & Aardenburg i te na e momentunan aki, ta traha komo abogado (hefe) pa Toelatingsorganisatie (TO) ántes konosí komo servisio di imigrashon.

Ta spera ku e huramentashon aki, e kadena hudisial lo haña e atenshon ku e meresé, pa motibu ku aktualmente tin hopi mal kontentu den e kadena hudisial.

E trabounan ku ta warda e Minister di Hustisia nobo no ta fásil. Pero si tuma nota di e nòmbernan ku lo bai forma parti di e gabinete di hustisia, ta primintí di por atendé ku tur e retonan ku e kadena hudisial ta konfrontando. NOTA: Texto ta scirbi den Papiamento fonetico di Corsou.