Corte di apelacion a absolve Booi y El Hage den caso Zambezi

KRALENDIJK - Burney y Ginia El Hage y Ramoncito Booi a wordo absolvi di tur cargo diahuebs, den e caso Zambezi. Remarcable, si tene na cuenta cu hues a pone 3 siman pa e veredicto diaranson ora cu e tratamento a caba. Pero apenas 5 ora despues cu tanto pareha El Hage como Booi a hiba nan ultimo palabra diahuebs mainta, Hof a dicta e sentencia. Booi no sa ainda kico e ta bay haci, mientras cu pareha El Hage a gradici tur hende pa nan confiansa. E abogado Geert Jan Knoops tabata contento cu e sentencia pa su tres clientenan. 

E CASO MES

Tabata diaranson  cu abogado general Ton van der Schans a pidi castigo condicional reduci den caso Zambezi e siman aki contra sospechosonan Ramoncito Booi y pareha  El-Hage na Bonaire.

TRATAMENTO DI CASO

Corte, presidi pa huez Ter Berg, a trata e caso di fraude di hipoteca y construccion di cas di e pareha El-Hage. Van der Schans a laga varios hechonan castigabel cay, pa falta di prueba. Booi tabata den corte atrobe pa falsificacion di firma, relaciona cu compra di un tereno. E tres sospechosonan a wordo absolvi di tur cargo.

CASTIGONAN PIDI

Contra pareha El Hage a pidi 4 luna di castigo di prison condicional, cu un prueba di 2 aña y 200 hora di trabou comunitario. Pa Booi, a pidi 6 luna di castigo di prison condicional y un periodo di prueba di dos aña y 240 hora di trabou comunitario. Tur esaki ta pa pasado, mirando cu tur tres persona a wordo absolvi.