SKOA: Si no haya solucion pa limpiesa di scol, lo tin cu cera scolnan

ORANJESTAD – Si no bin un solucion satisfactorio pa cu e situacion financiero di Stichting Katholiek Onderwijs Aruba (SKOA), varios scol lo mester cera nan porta ora cu e aña escolar nobo habri na augustus. Esaki tabata e scenario mas pio cu director di e fundacion, Anuesca Baly a pinta pa Noticiacla recientemente den e programa Noticiacla LIVE. Tur cos ta den man di gobierno y parlamentarionan cu por haci e cambionan necesario pa resolve e problema. Solucion tey, pero ta accion mester tuma pa e solucion keda ehecuta. Di otro forma, SKOA ta haye obliga di tuma medida. 

AUMENTO DI SCHOOLGELD

E director ta lamenta cu e mester a haci e anuncio di e aumento dramatico di schoolgeld, pero esaki ta e ultimo recurso, ya cu no ta tende nada di gobierno y of Parlamento. Cu gobierno ta bisa cu esaki a gara nan di sorpresa, no mester ta e caso segun Baly, ya cu for di December ultimo a splica gobierno pa medio di un carta. Pues pa nan bisa awor cu nan no sa, no ta comprendibel pa e director. Aworaki, e holoshi ta sigui bati, y mester bin un solucion prome cu fin di aña escolar actual. Sea parlamento ta cambia e ley y ta resolve e forma con SKOA ta haya placa, of ta cobra esaki di e mayornan. Y si ningun di e dos solucionan aki, no realisa, e ora tin cu tuma e paso aun mas drastico, cu ta cera e scolnan pasobra no por habri scol sushi. 

CONSENSHI

E director a sigura cu enberdad e ta pasa anochinan lanta ta pensa riba e asunto aki y e no ta nada facil. E no ta un paso cu e kier tuma, pero mayornan mester compronde tambe cu e situacion ta di tal forma cu no por otro. E mayornan tambe mester por compronde cu nan kier nan yiunan bay scol limpi, y higienico y no lo permiti pa nan yiunan bay scolnan ahigienico. Y pa esaki sosode, mester tin werksternan paga pa haci e trabou di limpiesa. 

POSIBEL SOLUCIONTin un grupo grandi caba cu tin areglo di pago, ya cu for di prome di pandemia, nan no por paga e placa di scol completo den un solo biaha. Pero esaki no ta un opcion cu por ofrece tur 9 mil alumnio y nan mayornan, pasobra esaki simplemente no ta funciona. Ya caba tin un grupo grandi cu tin un aña pa paga y di e grupo aki, un grupo grandi tin debe acumula caba cu nan no a caba paga ainda.