Awe un minister mas a ‘boycot’ un medio di comunicacion na Aruba

ORANJESTAD – Dialuna un di tres minister di gabinete Wever Croes a uni su mes na un ‘boycot’ contra e medio local 24ora.com. Ta trata di minister Glenbert Croes cu durante su conferencia di prensa, e la informa e representante di e medio, Marko Espinoza, cu e ta solidario na coleganan minister Endy Croes y Rocco Tjon di no contesta of papia mas cu e medio, ‘te ora cu nan tuma nan mes na serio’. For di dos siman pasa caba, dos minister a publicamente ‘distancia’ nan mes di e medio ey, pa e forma con e medio lo ta ataca nan di forma personal. Dialuna e minister en cuestion a acusa e medio di ta persigui no solamente e, sino su casa, su yiunan y su mama. 

CONFERENCIA DI PRENSA

Den pasado, e grupo di prensa a papia cu prome minister Evelyn Wever Croes riba e tema ey unda cu cierto ministernan tabata opta pa no manda invita cierto prensa y of nenga di contesta y atende cierto medionan di prensa y nan representantenan. A splica e tempo ey cu esaki no ta un practica corecto y cu durante un conferencia di prensa, mester por contesta tur periodista, den bista di transparencia di maneho di gobierno. Tambe a atende e parti unda cu no ta prudente pa limita e periodistanan na preguntanan limita sea na e tema of tempo, y a haya e promesa cu lo atende cu e respectivo ministernan e tempo ey. Recientemente a atende e prome minister caba riba e hecho cu por lo menos un minister a opta atrobe pa limita su mes na cierto medio so. E prome mandatario a keda di atende e situacion internamente. 

CORSOU

Na Corsou algun aña pasa tabatin un situacion casi similar. Na e instante ey, e minister a bay un poco mas leu y a prohibit cierto medio (Amigoe) di drenta e sala di prensa durante un conferencia di gobierno. E medio ey a hiba e minister corte y a gana e caso ey e tempo ey. No ta conoci si aki e medio en cuestion lo tuma paso, of lo laga e situacion te aki.