De Meza: Si ta su cabez of di hendenan di WEB mester cay

ORANJESTAD –  E reunion di parlamento riba hedging awe tardi a caba, y cu esaki a bin aun mas pregunta dilanti. Un cantidad di mocion a keda trata y pasa, y otronan rechasa. E pregunta miyonario e dianan aki, rond di e asunto di contract di hedging di WEB, ta ken su cabes lo cay pa esaki. Si ta e directiva di WEB, hunta di comisario, of e propio minister encarga, esta Mike de Meza. NoticiaCla.com (NC) a atende e mandatario awe tardi riba su responsabilidad pa e loke a sosode na WEB, y mas specifico, cu si e ta sinti cu e tin cu tuma su retiro como minister. E mandatario a sigura NC cu esaki no ta e caso. “Pa bo ta responsabel, bo mester tin e autoridad pa tuma accion. Bo no por wanta un hende responsabel of accountable si e no tin authorization adecuado pa preveni of tuma accion corectivo” e mandatario a sigui bisa. Segun e mandatario, cada ken riba nan manera ta responsabel pa e autorisacion cu nan tabatin pa nan por wordo wanta ‘accountable’. E ta basa su mes riba e structura actual unda cu segun statuto di WEB, minister no ta mete den e asuntonan interno. Ripitiendo e pregunta, e mandatario a bolbe contesta, pero den otro forma :”Si mi no a wordo informa y si mi no tabatin e autorisacion den e sistema existente pa por a tuma un decision pa preveni of coregi, si mi no tin e autorisacion ey, con bo por wanta mi accountable pa un accion?”, e mandatario a sigui contesta.

CABES LO CAY DEN WEB?

Ta sigui e pregunta e ora cu ‘cabes di ken lo cay den WEB’, ya cu e minister no ta esun cu lo retira. E mandatario a bisa NC cu lo tin cu trece cambio awor sigur. Pero, e tempo cu e mandatario a pone pa trece cambio den e structura, -sea si ta kita e hunta di comisario, of reemplaza e top di WEB, of e structura di e statuto-, ta dificil pa bisa. “Ta evaluando esey. No ta prudente pa bisa publicamente a base di un informacion of analisis cu bo no tin completo ainda, kico e accionnan aki lo ta”.

CAMBIONAN FORMAL

“Mester bay haci cambio formal unda cu tin cu haci cambio (necesario)”. Segun e mandatario, aworaki ta bezig cu analisis y tin cu wak con por impedi un ripiticion di loke a sosode rond di e proceso di hedging. Si dicidi cu ta continua cu hedging, tin cu structur’e bon, incluyendo e proceso di autorizacion. Mester haci cambio den statuto di WEB, y tambe e structura di e compania. Mester haci hasta cambio den e posicionnan y esnan cu tin e posicionnan. Pero e mandatario no a bisa si esaki kier men cu ‘cabez lo cay’ na WEB. Esey no ta contestanan cu por duna aworaki, e mandatario a bisa.

PODER DI GOBIERNO

Pa loke ta e poder di gobierno pa por haci cambio den WEB, y si esaki ta te hasta posibel, ta mucho prematuro segun e minister. Los di esey, ta mirando e posibilidad huridico pa kibra e contract. Pero e resultado preliminar ta indica cu kiebro di e contract di hedging, ta costa Aruba 130 miyon florin y mas gasto punitivo den corte di Merca. Kier baha e volumen y plama esaki riba varios aña pa toch e por beneficia pais Aruba.