Den un weekend, Corsou a conoce dos morto den trafico

WILLEMSTAD - Den un solo wikènt, Kòrsou a konosé dos morto den tráfiko. E promé tabata djasabra mardugá, miéntras e di dos a tuma lugá ayera atardi.

Ayera alrededor di kuartu pa kuater di atardi, Polis a risibí informashon di un aksidente bastante grave ku a tuma lugá riba Dominico Martina Boulevard (Nieuwehaven) na altura di edifisio di A.P.C. Na yegada di e promé unidat, el a topa un outo di famia di bòltu riba un pida seru algun meter for di kaya, miéntras un otro vehíkulo tabata pará na un distansia un poko mas dilanti riba e mesun kaya ariba menshoná.

Den e outo di bòltu tabatin kuater (4) persona inkluyendo dos turista i den e otro vehíkulo únikamente e shofùr. Mirando e situashon, a pidi presensia di e ekipo di reskate di brantwer na e sitio pa asina por a yuda kòrta e vehíkulo, ku tabata di bòltu. A saka 1 persona ku a keda pega den e vehíkulo i ku no tabata E víktima, un hende muhé a sufri múltiple leshon dor di e impakto i a fayesé na e sitio mes.Dòkter di polis ku tabata presente a konstatá morto di e dama víktima.

E otro 4 okupantenan a keda transportá ku 3 diferente ambulans pa sala di emergensia di C.M.C. pa asina nan por a risibí tratamentu médiko. Tur e 4 víktimanan aki su situashon ta di atenshon.

For di investigashon preliminar ku polis a realisá na e sitio, a sali na kla ku e dos outonan tabata kore riba Dominico “Don” Martina Boulevard den direkshon di Biesheuvel. Pa motibunan ku te ainda deskonosí, e dos vehíkulonan aki a aksidentá i probablemente shofùr di e outo ku a Bòltu, a pèrdè kontrol riba su stür i bai resultá kantu di kaminda riba un pida seru. No ta ekskluí ku entre otro ekseso di velosidat a hunga un ròl importante den e aksidente aki i tambe awaseru a kaba di kai basta duru.

Debí ku no a identifiká e víktima ainda ni tampoko a pone famia na altura, no por publiká su identidat. Personal di departamentu di tráfiko a keda enkargá ku e investigashon. Ámbos vehíkulo a keda konfiská i transportá pa warda di polis pendiente mas investigashon.

Pas na su restunan i forsa ta bai na famianan di e defuntu. NOTA: E articulo ta scirbi den Papiamento fonetico di Corsou.