De Meza ta purba clarifica declaracion contradictorio riba hedging

ORANJESTAD – “Ma bisa loke mi a bisa. Ta depende loke mi ta bisa. It is what I said”. Minister Mike de Meza su reaccion awe tardi ora cu e la wordo confronta pa NoticiaCla.com cu dos diferente grabacion cu e la haci na dos diferente ocacion riba hedging. E mandatario ta admiti cu enberdad e la haci e dos declaracionnan pero cu ningun momento e la gaña. Cada un a wordo haci na un diferente momento y e la splica esaki tambe. E problema ta cu e dos diferente grabacionnan ta como si fuera e mandatario ta bisa dos diferente cos, creando e impresion cu e no tabata bisa e berdad. Algo cu e mandatario a desmenti.

GRABACIONAN

E prome grabacion, ta un entrevista televisa (video)dia 8 di augustus 2012, unda cu de Meza ta bisa claramente di ta na altura di e proceso di hedging. E di dos combersacion ta un grabacion di un declaracion cu e la haci riba hedging (audio), na januari di 2015. E splicacion cu de Meza a duna ta cu tur dos e ta na altura di dje. Sinembargo e prome grabacion e tabata enberdad na altura cu tabatin hedging, pasobra e la wordo bisa despues cu e la tuma lugar. E di dos grabacion haci, de Meza ta bisa di tabata referi na e hecho cu na october/november 2014 e no tabata na altura cu a bolbe haci hedging. Pues berdad e ta nenga cu e sa di e hedging, pero e ora e ta referi specificamente na e hedging di 2014 y no 2012.

DECLARACION RIBA 2012

Riba insistencia di NC, a bolbe puntra e mandatario unda e fout ta y pakico tin dos diferente declaracion. E mandatario a sigura NC cu ta for di 2003 cu e tabata den oposicion cu tabata haciendo hedging. Esun di 2012, ta ora cu e la wordo informa door di WEB, ora cu tabata ocupa cu e dialogo social. “E ora mi a wordo informa cu tabatin hedging”.

DECLARACION RIBA 2014

E otro parti a sosode na augustus/ september 2014, ora cu Valero a cambia su proceso di cobramento, cu a pone hedging ya caba no tabata efectivo mas. Den careda di october/november, e mandatario a bisa, cu WEB lo a hedge caba. E biaha aki pa un termino mas largo di 2015, 2016. Despues di un investigacion a bin sali na cla cu enberdad a sera un contract nobo. “Gobierno no tabata sa sino te awor, cu e hedging a tuma lugar di 2014”. Wak e declaracion di 2012 aki y scucha esun di 2015 aki.