Hoevertsz: Valero a ‘pusha’ WEB cu e aumento di handling fee

ORANJESTAD – Aunke cu WEB a purba busca companianan internacional cu ta bende ‘heavy fuel oil’ mas ‘barata’, nan no a haya. Valero a resulta toch di tin e tarifa ‘mas abou y bentahoso’. Esaki minister di utilidad Mike de Meza a sigura parlamento awe mainta. Di otro banda tambe, -segun de Meza-, Valero tabata hopi cla den nan ‘negoshacion’ cu WEB y gobierno di Aruba riba e aumento di handling fee, di $4 pa $6.45 aña pasa. Esaki a sali na cla durante e presentacion ayera di WEB na parlamento y tambe awe mainta durante e presentacion di minister di utilidad di Mike de Meza. “No tabatin mucho di acepta. Valero a pusha nos cune”, Franklin Hoevertsz, director di Utilities NV a declara ayera. Y awe mainta de Meza a mustra cu Valero a dune un simple ‘no por’ riba su pregunta pa un posibel reduccion. Pues, WEB tin cu sigui paga e handling fee di $ 6.45 sin mas.

NEGOCIA

Segun Hoevertsz, Valero tabata hopi cla cu no tin espacio pa negocia riba e tema aki. Un di e puntonan tambe ta cu WEB no tin e forma pa almacena e volumen di heavy fuel oil, manera cu Valero tin. Tambe a confirma cu a cambia e forma di cobra y paga e fuel oil, cu sigur a perhudica WEB den esaki. A pasa di plats pa stock base, cu no tabata oportuno pa WEB.

HANDLING FEE

Awe mainta mientrastanto, minister de Meza a sigura parlamento cu a haci tur posibel pa reduci e handling fee. De Meza den un intento, a manda un carta pa e hefenan, pero ni asina no a logra. E mandatario a haya un cantidad di splicacion riba Valero su motivacion pa aumenta e ‘handling fee’. Un total di 5 pa 6 motibo, cu ta varia di e tarifa di carga, almacenahe, labor, ta pone cu finalmente e refineria su contesta tabata ‘no por reduci esaki’. Tambe e refineria a sigura e mandatario cu ni cu e tarifa actual di $6.45, e refineria no ta haci ningun ganashi riba esaki, y tampoco no ta cubri su gastonan incuri di e heavy fuel oil. Como tal dificilmente nan por cumpli cu peticion di e mandatario, esta pa reduci e fuel oil.

Na final, de Meza a sigura cu WEB ta ‘den proceso pa negosha un miho deal cu Valero’ pa e fuel oil. No ta sigur cu WEB lo logra, mirando e circumstancianan. Pero esaki no ta kita afo cu e compania di utilidad ta purbando, segun e mandatario.