CAFt: Aruba sea no ta cumpli, of no ta cumpli suficiente cu e recomendacionan haci

ORANJESTAD – Aruba of no ta cumpli cu recomendacionan cu e colegio di supervision financiero CAFt ta haci, of no ta cumpli suficiente. Esey ta un di e hopi kehonan cu CAFt ta haci den su ultimo reaccion di e raportahe di ehecucion final di Aruba pa 2022. “Aruba ta faya repetidamente den sigui e recomenacionan di CAft. Pa evita cu e debe grandi sdi Aruba aumenta aun mas a corto plazo, ta crucial pa sigui e recomendacionan pendiente” e colegio ta bisa, y despues ta bolbe resalta 7 recomendacion. E portal den e articulo aki ta subraya partinan di e rapport en cuestion. 

FECHA FINAL

CAFT a pidi Aruba pa prome cu fin di maart duna informa nan con e tin pensa di duna contenido na e recomendacionan y pa procesa esaki den e presupuesto 2022 cu un nota di cambio of un cambio di presupuesto.  

MANEHO NO TA NA ORDO

“E maneho financiero y e ciclo di rendicion di cuenta di Aruba ainda no ta den ordo” e colegio ta sigui bisa. Despues ta reclama riba e hecho cu presupuesto un biaha mas ta entrega laat. A confirma cu a ricibi e presupuesto 2022, pero no a cumpli cu e articulo 13 di e LAft cu ta stipula cu e presupuesto mester ta entrega na CAFt. Mientras cu no ta bisa nada di esey, ta conoci cu segun e mesun regla di LAft, incumplimento di esaki por nifica un ‘instruccion’ pa Aruba. “Entrega di e cuentanan annual di 2019 y 2020 a sufri retraso adicional, cu ta pone cu Aruba no a cumpli cu otro articulo di LAFt (articulo 17 inciso 4) y e ley di comptabilidad 1989. “E retrasonan aki ta e consecuencia di e deficiencia den e maneho financiero.  CAft  ta kere cu e un finanzas ordena ta e base pa un gobierno funciona bon” e colegio ta sigui bisa.  Ta constata tambe cu a duna insuficiente atencion y ehecucion na e medidanan pa baha gasto di personal conforme e BVP (Beleidsplan Verlaging Personeelslasten ), cu ta crea un falta di reduccion structural di gato di personal pa 2021. Ta papia di aumento di overtime den 2021, mientras cu e BVP ta prescribi cu esakinan mester baha. Lesa e rapport completo AKI.