Gobierno a haya un siman pa dicidi riba exigencianan presenta pa sindicato di Hospital

ORANJESTAD – Sindicato di hospital ABV ta duna gobierno te otro siman diaranson pa bin cu un solucion riba e situacion di recorte salarial, sino por spera problema. E presidente di e sindicato, Gina Maduro diaranson atardi a confirma pa noticiacla cu despues di e accion di 1 ora di dialuna (cu permiso di directiva di HOH segun Maduro), a reuni awe diaranson mainta cu directiva di HOH y tambe gobierno, y awor ta keda na e partidonan en cuestion pa tuma e decision corecto. 

MANDATO

E mandato di e sindicato ta cu nan ta contra reorganisacion di hospital, cu ta ensera cu no ta manda trahado cas, tin cu mantene salario 100% envez di e recorte di 5.5%, mantene vacantia uitkering 100%, pero vries e otro beneficionan secundario y cera un CAO pa termino di un aña y wak con ta sigui otro aña. “Mester bin un rust den cas” Maduro a sigui bisa. Tin un ‘onrust’ grandi den cuido y mester regla esaki pa no tin problema den cuido. Realisticamente, Maduro a bisa cu e no ta wak mucho otro caminda pa cana, cu no ta esun cu nan a presenta. Tin un desigualdad enorme den e CAO’nan segun Maduro, y esey mester wordo drecha tambe. 

E SITUACION DI PANDEMIA

Segun Maduro, e problema ta uno cu ta surgi for di April 2020 pa loke ta e recorte salarial, y den caso di hospital 5.5% cu ta conta pa IMSAN, RESPALDO, HOH y FMSLA esaki a cuminsa na juli di e mesun aña 2020. For di e momento aki, AVB a cera cabes cu veld di cuido y digitalmente tabata tuma accion pasobra no a bay den accion debi na pandemia di 2020. A keda traha duna servicio, y juli 2020 gerencia a bisa cu mester entrega debi na presion di AZV. Aki a cuminsa cu e presion a cuminsa. Awe nan ta cla cu esaki y no ta dispuesto mas pa sigui cu esaki. A bisa cu no ta descarta accionan otro siman dependiendo ki desaroyo tin riba e situacion aki.