Wever: Lista di eigen bijdrage aproba, ta un ‘merge’ entre proposicion di veld y AZV

ORANJESTAD – Gobierno di Aruba ta confortable cu e proposicion cu AZV a presenta pa e asunto di contribucion propio, esta ‘eigen bijdrage’, den e sentido cu esaki a bin for e mesun ‘veld’ medico. Asina minister presidente Evelyn Wever Croes a bisa recientemente den e programa Noticiacla LIVE. “E mesun veld a bin cu e proposicionan aki!” e mandatario a sigui bisa. Y cu AZV a calcula esaki mas aleu y a prepara e nota. Y gobierno a bay di acuerdo, contal cu tin un ‘vangnet’ pa esnan menos bon para. E hecho cu veld awor ta bisa otro, segun e mandatario ta e ora un confusion cu lo mester tin. 

VELD NO TA CONTENTO

E pregunta a bin a raiz di e echo cu veld medico no tabata na altura di e medidanan presenta pa AZV, y cu segun veld, ta gobierno ta esun cu a presenta AZV cu e lista di medida relaciona cu e eigen bijdrage. Y cu recientemente e director di AZV mes, ir. Edwin Jacobs a confirma den un mesun programa di noticiacla, cu ta for di Gobierno a ricibi e puntonan y a verwerk esaki den un lista di recomendacion. Mes momento sr Jacobs a admiti tambe cu veld di salud enberdad no a wordo inclui ainda pasobra ‘no tabata e momento’. 

CONFUSION

Segun prome minister Wever, lo mester tin un confusion e ora anto. E mandatario a bisa cu februari 2021, e mes a yama e veld hunto (medico), na Hyatt Place na Aeropeurto den un conference room, y a bisa cu tin un problema. Esaki pasobra Hulanda tabata persisti riba e suma. “Ami no kier corta manera un kaas Schaaf 5 miyon (florin:red) tur luna, pasobra mi sa cu e ta afecta cuido”, e mandatario a sigui bisa. “Boso bisa mi, kico mi por baha y na cuanto y mi ta usa esey como guia pa mi yega na cumpli cu Hulanda”, Wever a sigura cu e la bisa e veld na tal occasion. E ta sigura cu e la haya e rapport di veld despues, unda cu e informacion ta hopi cla, incluyendo contribucion propio (eigen bijdrage, positieve lijst y mas cos). “Loke cu falta pa discuti ainda ta cuanto e eigen bijdrage mester ta” e mandatario a bisa. Segun su pensamento, cu e specialistanan a propone eigen bijdrage pa eerste hulp masha halto mes, pero gobierno a resisti sino hendenan no ta bin eynan e ora.

SUGERENCIA NO A BIN DES MINISTER

E ‘storia’ cu ta minister di salud (lesa Dangui Oduber: red) a manda su lista di recomendacionan pa AZV ‘ehecuta’ no ta cuadra segun e prome mandatario. “No, no, mi no ta kere esey. Absolutamente cu no. Mi ta kere cu tin un confusion masha grandi mes, pero e unico cu por contesta esey ta minister Dangui Oduber” Wever a sigui bisa. Como minister president, Wever ta sigura si cu nan tabatin e rapport di veld, e 5 wave model di AZV y a base di esey, a bin un eind proposal cu a purba ‘merge’ kico si kico no. Despues a bin tambe pa fisioterapeutanan no cay aden. Pero di unda e la bin, ken a bin cu ne, kico sr Jacobs a bisa, kico Oduber a bisa, mi no por papia pa nan. Ami por bisa cu ministerraad a bay di acuerdo cu e proposicion cu tabatin riba mesa cu tabata un merge di e proposicion cu veld a bin cune y e 5 wave model”. 

AINDA POR TIN CAMBIOLoke tambe e mandatario a sigura ta cu ainda por trece cambio den e ley, prome cu pasa esaki pa april. Basta cu no tin demasiado cambio, tur cos entre awor y April, por ahusta pa na final tin un ley cu tur hende por biba cu ne. “E no ta scirbi den Piedra, si esey ta bo pregunta, pero nos ta sigur habri. Na fin di dia nos tin cu yega na un resolucion. Nos no por keda debati. Nos tin dos aña riba dje. Y cierto momento nos mester pone un punto tras di e discussion. Pero claro, e mester ta algo husto si. Algo cu nos por bisa cu nos por acepta!”, e mandatario a bisa finalmente.