Minister awor kier ‘participacion’ den negoshacionnan di WEB

ORANJESTAD – Minister de Meza awor kier ‘participacion’ den negoshacionnan di WEB. Segun e mandatario, no por ta asina cu discusionnan  importante manera hedging, nan no tin participacion. Ademas, si elimina e proceso di hedging pa prijs di heavy fuel oil, lo tin cu trece ‘brandstofclausule’ bek. Esaki ta un di e contestanan cu minister di utilidad Mike de Meza a declara awe mainta durante e prome tanda di su presentacion. Y tambe, WEB ta tratando di re negocia e contractnan di hedging pa uno cu ta beneficia Aruba mas. Algun di e puntonan cu a resalta awe mainta den Parlamento.

INSPRAAK DEN DESICION

Segun e mandatario, no por ta asina cu den un decision asina importante cu ta toca nos comunidad completo, e compania so por tuma cierto decisionnan. Como tal e la indica awe mainta cu e kier pa esey cambia. Si esey ta posibel, ta otro cos. Aworaki, segun e statutonan di e compania, gobierno no tin ‘inspraak’ den e decision tuma riba ‘e.o’ e hedging contracts, pues no a envolvi e mandatario den esaki. Mes momento tur responsabilidad pa e decisionnan tuma, ta cay pa e compania solamente. Cu cambio di e structura aki, gobierno tambe lo por wordo teni responsabel. Sinembargo no ta conoci pakico siendo un compania estilo ‘nv di gobierno’, cu nada no por wordo haci.

KIBRA CONTRACT DI HEDGING

A keda confirma pa e mandatario awe mainta, cu enberdad por kibra e contracto unilaterlamente, pero cu e tin consecuencia. E contractnan ,-segun de Meza-, ta sera a base di ley di New York, cu ta pone cu ora cu kibra e contract(nan), bo tin cu paga un daño considerable. E discusion segun de Meza sinembargo, ta, ki ora bo ta establece e daño. A mustra cu si hacie awo, siendo cu e tarifa ta abou, e por costa bo riba 100 miyon dollar sigur di multa. Decision riba esaki ainda no a wordo tuma segun de Meza.

RE-NEGOCIA CONTRACT

WEB mes momento, ta purbando pa negosha cu e companianan mericano pa un otro tipo di contract. E mandatario a sugeri cu un posibilidad lo ta pa enves di hedge pa 95% manera cu e ta aworaki, baha esaki te na p.e. 75% y e diferencia pase pa e proximo aña. Asina e efecto ta menos pa pais Aruba y posiblemente por reduci algo di e tarifa.

BRANDSTOF-CLAUSULE

Loke a hala atencion ta kico por pasa si kita e hedging completo. Segun e mandatario, a indica cu ta un hecho cu no por keda sin haci nada si dicidi di elimina e proceso di hedging. Tabata hopi cla awe mainta segun de Meza, cu algo tin cu bin na su lugar. Esaki lo meter ta un tipo di ‘brandstof clausule’ cu a base mensual, lo tin cu wordo calcula pa asina percura pa por cubri e gastonan cu WEB ta incuri pa su operacion. Algo cu den pasado caba tabata un problema pa comunidad compronde y acepta. A dicidi di kita e brandstofclausule for di e recibo, y bin cu un otro tipo di cargo, y despues traspasa esey pa proceso di hedging. Awor ta calcula esaki directamente den e tarifa di awa y coriente.

MOCIONAN DI AVP

Na final di e presentacion, a suspende e reunion pa 15 minuut, riba peticion di fraccion di AVP, pa nan por a pasa door di e informacionnan recien ricibi (minister a pone tur e contractnan ‘ter inzage’ di parlamento) , y tambe formula algun ‘mocion’, cu e partido tin pensa di entrega durante curso di e reunion di awe.