Pa diferencia di opinion, Ciruhano Peterson ta stop di traha cu AZV

ORANJESTAD - Ciruhano dr. Tim Peterson a laga sa e siman aki den forma di sorpresa, cu entrante 8 di maart 2022 (awe), e ta stop di traha cu AZV y su aseguradonan. E medico professional ta confia na noticiacla cu diferencia di opinion cu AZV ta pone cu e ta tuma e medida drastico aki. Segun e medico, ta bou di presion, Peterson a entrega su toelating di Hospital Horacio Oduber. Motivo di esaki segun Peterson ta cu H.O.H. y IVA (Inspeccion di Salud)  kier a exihi cambio den e manera cu e ciruhanonan ta traha cu otro.  

SIGUI CU SERVICIO

Dr. Peterson a informa di ta spera di por a sigui brinda servicio na aseguradonan di AZV na Imsan y su consultorio. “Lastimamente no por a yega na un acuerdo mutuo cu AZV pa sigui brinda servicio na Imsan pa e aseguradonan di AZV” Peterson ta sigui bisa.

AÑA DI SERVICIO

Despues di a dedica 27 aña na Aruba (y 21 aña cu AZV) como algemeen chirurg specialisa den cirugia di cancer, digestiva, vascular, traumatologia, endocrinologia, malesa di pecho y padiatrica dr. Peterson lo sigui por lo pronto atende solamente patiënt particulier (na su consultorio y na cas di patiënt) y lo explora opcion y posibilidad pa ofrece su expertisio amplio den region/exterior. E la informa tambe cu patientnan particulier por sigui yama consultorio pa traha afspraak pa consulta na 5878864.