Awe mainta a detene e di dos persona den caso penal Flamingo

ORANJESTAD – Awe mainta landsrecherche a detene e di dos persona den caso penal Flamingo. Vocero di Ministerio Publico a confirma cu e detencion di e persona a tuma lugar na Kurimiau. Noticiacla a haya info tambe cu ta trata di e homber ‘F’. Croes. Mas informacion ministerio publico no por a duna ainda awe mainta. Tabata siman pasa diaranson cu e prome detencion a cay, e senjora E. 

E CASO

E prome detencion a cay di e caso pues siman pasa. Vocero di Ministerio Publico Ann Angela a confirma esey tambe e dia ey. Mas informacion no por a duna, pero a confirma cu ta trata aki di un persona fenemino inicia E. E caso ta interesante den forma cu ta trata tambe un caso relaciona cu ex minister Otmar Oduber pa loke ta otorgamento d tereno comercial. E caso ta andando for di 2019 pero ta na 2020 a cuminsa haci entrada hudicial na varios cas, entre nan di e ex mandatario. 

E CASO 

E investigacion ‘Flamingo’ ta dirigi primordialmente riba iregularidadnan den otorgamento di terenonan comercial di erfpacht den e periodo di 2017 pa 2019. Mas concretamente bisa: e investigacion ta dirigi su mes riba e pregunta si un of mas compania a logra  obtene incorectamente (un optie) riba terenonan di erfpacht den e periodo di november 2017 pa december 2019, caminda ta investiga tambe e eventual rol di e minister anterior. Den e huiszoekingnan a confisca documentonan y cargadornan di data. Pa awor no tabatin ningun detencion. Di awor pa dilanti e team investigativo lo analisa e contenido di e administratie y e computernan cu a wordo tuma den beslag, y lo scucha e sospechosonan y testigonan.  E investigacion ta den su fase inicial. Ministerio Publico no por bisa ainda si despues lo sigui cu detencion di un of mas sospechoso.  Esey ta depende di e resultadonan di e investigacion. Ministerio Publico no kier duna mas informacion na e momento aki tocante e identidad di e sospechosonan y/of di e sospechonan contra nan.

INVAL

E invalnan cu a tuma lugar na varios cas y negoshi, a haya e nomber “Flamingo’pues.  Durante e invalnan a bishita entre otro cas(nan) di ex minister Otmar Oduber y comerciante R.H. Ademas a bishita un negoshi na Rumbastraat. Tur esaki a keda confirma finalmente pa ministerio publico, cu ta confirma cu ta Landsrecherche (LR)  en cooperacion cu RST (Recherche Samenwerkingsteam) y Cuerpo Policial Aruba y bao guia di huez-comisario, a haci e invalnan aki. OM a confirma e tempo ey cu ta investiga e ‘rol’ di e ex minister den e asunto aki. Esey ta splica e inval na su dos dos casnan. 

INVESTIGACION

E huiszoekingnan aki tabata den cuadro di un investigacion penal di Landsrecherche tocante posible delitonan di corupcion y otro hechonan castigable relaciona cu otorgamento di tereno di gobierno. E investigacion penal aki ta carga e nomber codigo ‘Flamingo’. 

ORDEN FOR DI SEPTEMBER 2019

Procurador-general  a duna Landsrecherche opdracht na september 2019 pa cuminza e investigacion aki relaciona cu informacion cu Ministerio Publico a ricibi di Cuerpo Policial di Aruba. Den e investigacion tin informacion tambe cu a wordo suministra na Ministerio Publico pa varios persona y organizacion.