A dicidi pa cancela celebracion di Arubadag 2022 na Hulanda

DEN HAAG  – Na Hulanda a dicidi cu ta cancela celebracion di Aruba Dag e aña aki , esta 2022. Asina a bira conoci dialuna mainta. Segun un comunicado di Hulanda, a informa cu esey ta e decision despues di un   reunion extraordinariodi Comision Arubadag festival Virtual Edition 2022  pa tuma un posicion cla pa loke ta e evento pa e aña aki. Y despues a anuncia e decision pa cancela e evento.   

GASTONAN 

Enbista di e restriccionnan severo for di Aruba pa loke ta e gastonan envolvi pa organisa Arubadag 2022, comision a analisa e produccion pa purba baha e gastonan segun ahustacionnan proponi pa Aruba. Dicho ehercicio a duna como resultado cu e contenido di e programa no ta un refleho apropia mas di e gastonan pa cu e gastonan envolvi.

NO TA FULL RECUPERA 

E realidad di e situacion financiero di Aruba - cu te ainda ta leu di un recuperacion total pa motibo di e pandemia di COVID -  ta pone cu no tin otro opcion cu Edicion Virtual di un Arubadag. Un edicion virtual ta pone presion riba e aspecto di calidad pa nos por papia di un evento exitoso. Bou di e condicionnan actual simplemente un reto inalcansabel pa e Comision Arubadag.

GUERA

Minister Besaril: ‘Pa nos di Comision Arubadag y mi persona como Minister Plenipotenciaro, e situacion na Europa unda tin un guera andando y cu tin su impacto riba henter e continente, ta un motibo di igual importancia cu e situacion financiero di Pais Aruba. E no ta mishi cu e amor profundo cu e Rubiano ta sinti pa su himno y bandera, pero e ta pone riba mesa si e pregunta cu si e ta realmente e momento propisio pa fiesta aki na Europa.’ ‘Tumanda na consideracion tur e aspectonan aki, comission Arubadag Festival 2022 a tuma e decision dificil pa cancela e evento pa e aña aki y concentra riba e preparacionnan pa 2023. Nos ta lamenta e decision aki, den bista cu comission Arubadag Festival 2022 pa luna nan a traha duro den e prepraracion pa e evento aki. Esaki tambe ta conta pa artistanan y otro persona y companianan cu desde un principio a cana cu nos e caminda aki pa yega na un celebracion special,’  Minister Plenipotenciario Guillfred Besaril a declara. Potret ta cortesia di Arubahuis