Minister no ta apoya aumento drastico di schoolgeld di scolnan di SKOA

ORANJESTAD – Minister di enseñansa Endy Croes no ta apoya e aumento drastico di schoolgeld di scolnan di Stichting Katholiek Onderwijs Aruba (SKOA), di 175 florin te na algo di 500 florin. E mandatario a declara esey diabierna atardi den un mensahe di video. E mandatario ta subraya si cu gobierno no por mete den maneho di SKOA, y ta na mesa cu nan pa wak kico por haci. E motibo di e aumento ta un consecuencia di e problema cu scarsedad di placa pa werksters di SKOA y pa por cumpli, mester aumenta e schoolgeld e ora di e forma cu a menciona. E mandatario a mustra cu contrario na scolnan di SKOA, e scolnan publico, esta di DPS, lo no conoce aumento y esey lo por ta un alternativa. E mandatario a pidi pa comprension pa e situacion y ta kere cu den e luna di maart aki mes, lo por tin un solucion positivo cu ta resolve e aspecto di werksters y consecuentemente elimina e aumento di schoolgeld. E portal aki a tuma contacto cu director di SKOA, sra Anueska Baly pa un reaccion riba e asunto di aumento di schoolgeld pero no tabata exitoso ainda den esaki.