Lampe: Obispo Secco no ta papia e berdad

ORANJESTAD - Obispo Secco no ta papia e berdad . Palabra di ex pastoor y lider politico Rudy Lampe, como reaccion riba declaracion e siman aki di Obispo riba e asunto di politica di Lampe. “Ta duel mi cu publicamente mi tin cu bisa cu obispo di Willemstad, Monseigneur Secco a bisa mitad berdad y mitad berdad ta un mentira. Ta duel mi, pasobra mi ta stima mi Iglesia catolico, y si obispo no a bin dilanti den publico ami tampoco lo a trese esaki den publicidad” Lampe ta bisa. Una bez cu Mons. Secco a bai publico cu informacion erroneo, Lampe ta bisa cu e tin derecho pa coregi esaki.

CARTA

Segun Lampe, e tin e carta di Mons. Secco di 2005 unda obispo ta prohibi mi di haci misa, pasobra mi a drenta e arena politico. “E momento cu mi a anuncia cu lo mi funda un partido politico cu lo participa na eleccion na september 2005 mi a keda suspendi y mi no por a celebra misa mas” Ora cu toch E a celebra un misa, Mons. Secco a mande un carta di prohibicion, y esaki tabata prome cu e eleccion na september 2005.

HURAMENTACION

Despues cu Lampe a huramenta como parlamentario na november 2005, e a haya bishita di e nuncio di Trinidad na december cu a dune un ultimatum di dos siman pa presenta su (Lampe) renuncia como parlamentario, y den caso cu e no renuncia como parlamentario e tin cu renuncia como sacerdote. Na januari 2006 den oficina di obispado na Willemstad Mons. Secco ta risibi Lampe y ta comunica cune cu e ta sostene e nuncio y cu e no ta di acuerdo cu Lampe ta parlamentario y e ta spera su carta di renuncia. “A base di esei mi a presenta un carta na Papa Benedicto na januari 2006 unda mi a dicidi di keda como parlamentario, y cu por lo tanto mi ta renuncia como sacerdote” Lampe ta sigui bisa.

DEROTA

Na october 2009, despues di mi derota electoral, Lampe a reuni den camber di obispo na pastorie di Playa cu Mons. Secco y eynan e la pidi Mons. Secco pa bolbe bek pa eherce su ministerio sacerdotal, ya cu no tabata tin ningun decision di Vaticano y cu e no ta parlamentario mas. “Mi a menciona den e combersacion cu mi ta dispuesto pa bira pastor di Rincon na Boneiro, cu tabata tin dos aña sin un pastor, y asina lo mi ta leu di Aruba. Mons. Secco a nenga mi proposicion y e a bisa mi cu mi mester ta suficientemente madura pa atene mi mes na e consecuencianan di mi firma na 2006 unda mi a renuncia na e sacerdocio pa por keda den parlamento y cu e no ta acepta mi mas como sacerdote” . Mons. Secco a bisa Lampe ademas cu e ta spera un pastor colombiano pa bira pastor na Rincon.

PERMISO

“Cu mi a renuncia boluntariamente ta berdad, pero tambe ta berdad cu Mons. Secco no a duna mi permiso pa ta na mesun momento sacerdote y politico” Lampe ta bisa. Segun e ex sacerdote, derecho canonico ta duna e obispo local e poder pa autoriza y duna permiso na un sacerdote pa ta den politica, “ pero Mons. Secco a nenga di duna mi e permiso aki. Pesei mi a haya mi obliga pa renuncia como sacerdote pa por cumpli cu e reglanan di Iglesia catolico. “Te aki e declaracion di Lampe. No a logra (ainda) pa haya reaccion di Obispo Secco.