Wever: Door cu WEB no a hedge fuel oil pa 2022, tin cu paga prijs completo awo

ORANJESTAD – Door cu nos planta di awa WEB no a ‘hedge’ HfO (Heavy Fuel Oil) pa 2022, e lo tin cu bay paga e ‘volle pond’  proximamente. Esey prome minister Evelyn Wever Croes a confirma diahuebs den e programa Noticiacla LIVE. Tabata aña pasa cu e mandatario a informa cu e no tabata contento riba e situacion ey pasobra door di no hedge, Aruba lo a keda ‘habri’ pa e prijs di mercado. Mes momento si, e mandatario a sigura cu esey no necesariamente kier men cu e prijs di awa y coriente lo subi. “Gobierno tin esaki den deliberacion, pa delibera cu WEB riba esey” e mandatario a sigui bisa. E motibo cu WEB a duna e tempo ey (aña pasa) segun e mandatario, ta cu no tabata ‘oportuno pa hedge e fuel oil. No por a bisa cuanto e cantidad almacena ta, esta cu cuanto tempo ainda por bay sin cu tin cu cumpra e prijs mas caro pa e fuel oil.