APA : Atrobe lo por surpasa 600.000 pasahero cu ta paga tax

ORANJESTAD - Aruba Ports Authority ta Premira un aña Crucero Saludabel. Segun oficialnan di APA, crecemento mester bay man-den-man cu e infrastructura existente pa no perhudica servicio. Mientras cu 2014 tawata un aña "shoulder-to-the–wheel", debi na entre otro e inicio di e trabounan na Barcadera, hopi cambionan remarcable a tuma lugar den e industria crucero tambe.

PFC

E entidad portuario a mira un aumento barbaro den yegada di pasahero crucero cu ta paga e passenger facility charge (PFC) durante lunanan "off-season" esta e lunanan di Mei, Juni, Juli, Augustus y September 2014, compara cu un aña record manera 2013, principalmente debi na incentivonan pa temporada abou cu nos a bin ta duna.

TENDENCIA PRINCIPAL

Un di e tendencianan principal di e industria crucero cu nos a bin ta observa durante e ultimo añanan ta e interes di companianan manera Royal Caribbean den paisnan Asiatico y Australia. Na 2014 tanto Carnival Corporation y Royal Caribbean Cruises Ltd. a anuncia e expansion di nan flota di barco na China. Esaki lo trece cu ne naturalmente cu nan lo tin un " shift" den nan capacidad for di e mercadonan madura (mature markets) manera Caribe, y cu ta inclui Aruba y e isla biciñanan, entre otro.

PROYECCION

Apesar di esaki, cu no ta in usual den e industria, APA ta proyecta pa mira aun mas yegada di pasahero prominente mente ariba e barconan di Carnival Cruise Lines, cu cerca di 150.000 pasahero. Princess Cruises y Royal Caribbean tambe lo sigui trece cantidad significativo di pasahero. Segun e ultimo reservacionnan haci pa e lineanan crucero na Aruba Ports Authority, APA ta proyecta cu un biaha mas nan lo por surpasa e cantidad di 600.000 pasahero cu ta paga e PFC, locual pa e puerto ta indicativo di un industria saludabel. E pensamento aki ta basa ariba e puerto su capacidad di ocupacion maximo pa mantene e bon servicio cu Aruba ta conoci pe. Mientras cu nan meta ta pa sigui crece e industria, esaki lo ricibi mas enfoke unabes e servicionan di carga muda pa Barcadera. Ta di sumo importancia pa e crecemento di bishitante bay man den man cu e infrastructura necesario pa por mantene e servicio actual. Nos industria crucero ta un di e contribuidonan principal na nos forza laboral, primordialmente den Oranjestad. Ta APA su intencion pa mantene un industria saludable y viable, mientras ta enfoca ariba ofrece e miho calidad di servicio posible. Pa mas informacion ariba cifranan oficial di turismo crucero por bishita: http://www.arubaports/statistics