Na Corsou a condena un conocido rapper na 4 aña di prizon

WILLEMSTAD - E rapper Prinston Poulina (34) ayera a  keda kondená na 4 aña di prizòn, akusá di tres echo serio, di kua atrako, ladronisia i maltrato. Ta trata di atrako riba  Kraam Kliniek dia 20 di novèmber 2021, dia 9 di novèmber a bai ku un kluis ku tabata kontené 19.921,18, mil florin di Distribier N.V. i dia 8 di novèmber a destruí kluis di Ritz Village Hotèl ku tabata kontené 23 mil 147  florin. Motibu ku e rapper a kometé e krímennan aki, ta pa   desesperashon ku pa motibu di pandemia di covid e no por a duna shownan a para i e no tabatin entrada mas. Su famia mester kome i no sa kiko pa hasi. El a bisa ku e ta para pa su aktonan i ta dispuesto pa paga tur kos.

Poulina a bisa ku e tin 22 kantika skibí pa e hóbennan  no bai den mal kaminda. E ke ta ehèmpel pa nan.

Fiskal tabata kòrtiku den su rekisitorio, debí ku e akusado a atmití su kulpa.  El a bisa ku na 2015 Poulina a kai pa droga i na  2018 pa poseshon di arma. Segun fiskal, Poulina ta papia di famia i ku e tabatin mester di sèn, pero segun rapòrt di Reclassering tur dia Poulina ta huma mariwana.

Segun fiskal, e sèn ku e akusado ta kumpra mariwana e por spar e pa  kria su yunan. Reclassering ta haña ku Poulina mester di yudansa. Fiskal ta haña e akusashonnan probá i ta demandá Poulina na 5 aña kastigu di prizòn. Wes den su desishon  a bisa e akusado, ku e komprondé ku covid a afektá hopi hende finansieramente, pero esaki no ta motibu pa kue sèn di otro hende. Wes a tene kuenta ku e maltrato di e bewaker pero no por proba ku nan a hòrta su plaka.

Na final wes ta haña e akusashonnan probá pero ta desviá un tiki for di e demanda di fiskal i ta kondená e akusado na 4 aña di kastigu di prizòn. Nota: E texto ta scirbi den Papiamento fonetico di Corsou.