Aruba lo haya su prome doctor medico forensico

ORANJESTAD - Aruba lo haya su prome doctor medico forensico. Asina gobierno di Aruba a informa recientemente. Ta trata di e medico dr. Vincent Latour, actualmente jeugd arts na Departamento Di Salud Publico (DVG), cu recientemente a bai Hulanda pa specialisa como medico forensico pa Aruba. E posibilidad pa e specialismo  aki a wordo realisa dor di DVG den colaboracion cu Ministerio di Asuntonan General, Departamento di Recurso Humano,  Family Justice Center (FJC) y NSPOH (Netherlands School of Public & Occupational Health). Depues di añanan sin un propio medico forensico porfin Aruba lo yega na su prome propio medico forensico. E medico forensico su tarea principal ta pa assisti mastanto den investigacion forensico di abuso sexual y violencia relacional severo. Esaki lo fortifica e parti di sporenonderzoek y lo fortifica tambe e colaboracion entre varios instancia, entre otro Jeugd- en Zedenpolitie (JZP) y Cuerpo Policial (KPA), Horacio Oduber Hospital, Directie Voogdijraad, Directie Sociale Zaken, Bureau Sostenemi, Openbare Ministerie, Veiligheidshuis y mas partners.