Gobernador di Aruba a hasi e apertura di “siman di placa chikito”

ORANJESTAD – Recientemente Gobernador di Aruba Sr. Refunjol a duna inicio oficial di e siman di placa chikito na St. Dominicus College. E Siman di Placa Chikito ta un programa educacional cu a sali for di un iniciativa di Kiwanis Club of Young Professionals Aruba (KYPA). Den un klas cu presencia di alumnonan, miembronan di KYPA, patrocinadornan principal Aruba Bank y Caribbean Mercantile Bank como tambe presidente di Aruba Bankers Association. Gobernador a hasi e apertura oficial di e Siman di Placa Chikito door di a hasi entrega di e prome paketenan di les na un alumno di e scol. Despues di esaki e patrocinadornan principal a hiba palabra di felicitacion pa cu e apertura. Executive Director di Aruba Bank, Señora Gina Habibe a enfatisa “Nos como sponsor ta bai yuda KYPA cu e programa no solamente e parti financiero, sino tambe nos ta yuda cu concientientizacion cu tur e producto di ‘savings’ cu nos tin”. Senior Business Developer di Caribbean Mercantile Bank, Señor Armin Solognier a menciona cu “Mas trempan e muchanan ta conciente di ‘budget’ di spaar y di con placa ta funciona, mas valioso esaki ta”. Gobernador a expresa cu e ta admira e esfuersonan di KYPA y e ta convenci cu e aporte di e club di voluntario ta hopi grandi den nos comunidad. Presidente di Kiwanis Club of Young Professionals Aruba Sr. Rendell de Kort tambe tabata presente y a comparti su alegria pa por mira e proyecto bira un realidad.

ABA

Presidente di Aruba Bankers Association (ABA), Sr. Pierre Rafini a felicita KYPA pa cu e iniciativa aki pa asina duna e muchanan di Aruba e les di educacion di placa. ABA ta contento tambe cu dos di su miembronan Aruba Bank y Caribbean Mercantile Bank a sa di tin un rol prominente den e proyecto akinan.

KYPA

Durante henter e siman aki e hobennan miembro di KYPA conhunto cu varios voluntario di nos comunidad lo ta dunando e curso di educacion financiero na diferente scolnan di Aruba. Algun di e topiconan lo ta Entrada Propio, Spaar, Gasta Placa y Comparti Placa. Ademas por medio di medionan di comunicacion lo stimula mayornan pa educa nan yiunan riba e topiconan financiero. Esaki lo yuda e muchanan pa ta mihor prepara den futuro ora di anda cu placa. Scol nan cu no a registra pa hasi esaki ainda por hasi esaki mandando un email na secretary@kyparuba.org